លើកដំបូងហើយ! អ៊ុយក្រែន ប្រើរ៉ុកកែតផ្តល់ដោយអាមេរិក​ បាញ់សម្លាប់កងទ័ពរុស្ស៊ី រាប់សិបនាក់

ទីក្រុង កៀវ និយាយ​ថា ទាហាន​រុស្សី​រាប់សិប​នាក់ ​ត្រូវ​បាន​សម្លាប់​ក្នុង​ការ​វាយ​ប្រហារ​លើក​ដំបូង​មិន​ធ្លាប់​មាន​របស់​អ៊ុយក្រែន​លើ​ប៉ុស្តិ៍​បញ្ជាការ​មួយ​របស់​លោក ពូទីន ដោយ​ប្រើរ៉ុកកែត​ ​រយៈ​ចម្ងាយ​ឆ្ងាយ​របស់​អាមេរិក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មេបញ្ជាការបាននិយាយថា ទាហានរុស្ស៊ីយ៉ាងតិច ៤០នាក់ ត្រូវបាត់បង់ជីវិត បន្ទាប់ពីកងទ័ពអ៊ុយក្រែនបានប្រើប្រាស់ប្រព័ន្ធ HIMARS របស់អាមេរិក ដើម្បីបំផ្ទុះមូលដ្ឋាននៅជិតទីក្រុង Izyum ក្នុងតំបន់ Donbas។

វីដេអូដែលបង្ហោះកាលពីចុងសប្តាហ៍ បានបង្ហាញពីលទ្ធផលនៃការវាយប្រហារ រួមទាំងអគារដែលត្រូវបានបំផ្ទុះ និងរថយន្តធុនធំមានសញ្ញាអក្សរ “Z”​ ឆេះយ៉ាងសន្ធោសន្ធៅផងដែរ។

មេបញ្ជាការទីក្រុង កៀវ និយាយថា ការវាយប្រហារនេះ បានបំផ្ទុះសាលារៀន Izyum Lyceum No2 ដែលត្រូវបានប្រើប្រាស់ជាមូលដ្ឋានរបស់កងកម្លាំងរុស្ស៊ី។

អ៊ុយក្រែន និយាយថា ទាហានរុស្ស៊ីទាំង៤០នាក់ដែលស្លាប់ គឺមកពីអង្គភាពលេខ ៨៩៤២៥ នៃស្រុកយោធាខាងលិច។

ស្របពេលជាមួយគ្នានោះ រុស្ស៊ីបានទទួលស្គាល់ការវាយប្រហារនេះ ហើយសារភាពថា ជាការវាយប្រហារដោយប្រព័ន្ធរ៉ុកកែត HIMARS ប៉ុន្តែនិយាយថា វាបានវាយប្រហារទៅលើមន្ទីរពេទ្យ និងសម្លាប់ជនស៊ីវិលពីរនាក់។

គួរបញ្ជាក់ថា អាមេរិកបានចាប់ផ្តើមបញ្ជូនប្រព័ន្ធរ៉ុកកែតរយៈចម្ងាយឆ្ងាយដ៏ទំនើប ទៅឲ្យប្រទេសអ៊ុយក្រែនកាលពីដើមខែនេះ បន្ទាប់ពីមានការស្នើសុំម្តងហើយម្តងទៀតពីទីក្រុង កៀវ ដែលនិយាយថា ខ្លួនត្រូវការសព្វាវុធដើម្បីទប់ទល់ជាមួយរុស្ស៊ី នៅក្នុងតំបន់ Donbas៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Daily Mail

ចុចអាន៖ រុស្ស៊ី បាញ់ស្រោចមីស៊ីលលើរដ្ឋធានី កៀវ ជាលើកដំបូង ក្នុងរយៈពេល ៣សប្តាហ៍