អាមេរិក ថា ពូទីន នៅតែចង់ដណ្តើមយកទឹកដី អ៊ុយក្រែន ភាគច្រើន (មានវីដេអូ)

ប្រធានាធិបតីរុស្ស៊ី លោក វ្ល៉ាឌីមៀរ ពូទីន នៅតែចង់ដណ្តើមយក ទឹកដីអ៊ុយក្រែនភាគច្រើន។ នេះបើតាមការឲ្យដឹងពីទីភ្នាក់ងារចារកម្មអាមេរិក។

លោកស្រី Avril Haines នាយកនៃទីភ្នាក់ងារចារកម្មជាតិ បាននិយាយថា វាមានន័យថា សង្រ្គាមអាចអូសបន្លាយរយៈពេលយូរ។

កាលពីខែមីនា ទីក្រុងមូស្គូបានបង្វែរគោលដៅ ទៅដណ្តើមយកតំបន់ Donbas របស់អ៊ុយក្រែនវិញ បន្ទាប់ពីបរាជ័យក្នុងការវាយយកទីក្រុង កៀវ និងទីក្រុងផ្សេងៗទៀត។

លោកស្រី Haines លើកឡើងថា លោក ពូទីន នៅតែមានគោលដៅដដែល ដូចទៅនឹងគោលដៅដែលលោកមាននៅពេលចាប់ផ្តើមនៃជម្លោះ។ ប៉ុន្តែលោកស្រី​និយាយ​ថា រុស្ស៊ី​ទំនង​ជា​មិន​អាច​សម្រេច​បាន​នូវ​គោលដៅ​នោះ​ក្នុង​ពេល​ឆាប់ៗ​នេះ​ទេ។

ចាប់តាំងពីបរាជ័យក្នុងការសម្រេចបាននូវគោលដៅដំបូងរបស់ខ្លួន ក្នុងការដណ្តើមយកទីក្រុង កៀវ, ប្រទេសរុស្ស៊ីបានផ្តោតលើការដណ្តើមយកទឹកដីនៅក្នុងតំបន់ឧស្សាហកម្ម Donbas ភាគខាងកើត ជាកន្លែងដែលលោក ពូទីន អះអាងថា អ៊ុយក្រែនបានប្រព្រឹត្តអំពើប្រល័យពូជសាសន៍ប្រឆាំងនឹងអ្នកនិយាយភាសារុស្ស៊ី។

កងកម្លាំងរុស្ស៊ីបានទទួលជោគជ័យនៅទីនោះ ដោយថ្មីៗនេះបានកាន់កាប់ទីក្រុង Severodonetsk ប៉ុន្តែការវិវឌ្ឍន៍មានភាពយឺតយ៉ាវ ហើយកងកម្លាំងអ៊ុយក្រែនបានតស៊ូយ៉ាងខ្លាំងក្លា។

នៅក្នុងការអត្ថាធិប្បាយជាសាធារណៈលើកដំបូងរបស់លោកស្រីចាប់តាំងពីខែឧសភា លើការវាយតម្លៃចារកម្មរបស់សហរដ្ឋអាមេរិក, លោកស្រី Haines បានលើកឡើងថា ការលុកលុយរបស់រុស្ស៊ីនឹងអូសបន្លាយរយៈពេលយូរ ហើយថា រូបភាពនៅតែអាក្រក់៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ BBC

ចុចអាន៖ សមាជិកណាតូ ថា មានតែការប្រយុទ្ធគ្នាលើសមរភូមិប៉ុណ្ណោះ ទើបអាចបញ្ចប់ជម្លោះនៅ អ៊ុយក្រែន បាន