រដ្ឋមន្ត្រីការបរទេស ចិន នឹងទៅ មីយ៉ាន់ម៉ា ជាលើកដំបូង ចាប់តាំងពីយោធា ឡើងកាន់អំណាច

អ្នកនាំពាក្យយោធាមីយ៉ាន់ម៉ាលោក Zaw Min Tun បាននិយាយថា រដ្ឋមន្ត្រីការបរទេសចិននឹងធ្វើដំណើរមកកាន់ប្រទេសមីយ៉ាន់ម៉ានៅចុងសប្តាហ៍នេះដើម្បីទៅចូលរួមកិច្ចប្រជុំថ្នាក់តំបន់ ហើយនេះគឺជាដំណើរទស្សនកិច្ចផ្លូវការរបស់មន្ត្រីជាន់ខ្ពស់ក្រុងប៉េកាំង ចាប់តាំងពីយោធាឡើងកាន់អំណាច ។

ប្រភពព័ត៌មានឲ្យដឹងថា ប្រទេសចិនគឺជាប្រភពអាវុធដ៏សំខាន់ និងជាសម្ព័ន្ធមិត្តរបស់យោធាមីយ៉ាន់ម៉ា ហើយ​បាន​បដិសេធ​មិន​ចាត់​ទុក ​ការដណ្តើម​អំណាចពី​រដ្ឋាភិបាលស៊ីវិល​របស់​លោកស្រី​ អ៊ុងសាន ស៊ូជី​ កាលពី​ឆ្នាំ​មុន​ថា​ ជា​រដ្ឋប្រហារនោះទេ ។

អ្នកនាំពាក្យយោធាមីយ៉ាន់ម៉ាបានប្រាប់សារព័ត៌មាន AFP ថា រដ្ឋមន្ត្រីការបរទេស​ចិន លោក វ៉ាង យី នឹងបំពេញទស្សនកិច្ចនៅមីយ៉ាន់ម៉ាដើម្បីចូលរួមកិច្ចប្រជុំយន្តការកិច្ចសហប្រតិបត្តិការឡានឆាង-ទន្លេមេគង្គ (Lancang-Mekong) ។ ប៉ុន្តែ​អ្នកនាំពាក្យ​រូបនេះបញ្ជាក់ថា ​ជំនួប​រវាង​លោក វ៉ាង យី និង​លោក មីន អ៊ុងឡាំង អាចនឹងកើតឡើង ​ឬ​អត់​នោះទេ ។

ជាចុងក្រោយអ្នកនាំពាក្យយោធាមីយ៉ាន់ម៉ាបញ្ជាក់ថា កិច្ចប្រជុំដែលបានទទួលការគាំទ្រពីប្រទេសចិន ​គឺ​ជា​សមាហរណកម្មរបស់​ប្រទេស​ក្នុង​តំបន់ទន្លេ​មេគង្គ(ឡានឆាង) ដែលគ្រប់គ្រងចរន្តទឹក ខណៈរដ្ឋមន្ត្រីការបរទេសកម្ពុជា ថៃ ឡាវ មីយ៉ាន់ម៉ា និងវៀតណាម ក៏នឹងចូលរួមកិច្ចប្រជុំនៅថ្ងៃទី ២-៥ ខែកក្កដាខាងមុខនេះផងដែរ ៕

ប្រែសម្រួលដោយ ៖ គង់ សំអាន

ប្រភព ៖ MGR Online

ចុចអាន ៖ លោក ស៊ី ជីនពីង ធ្វើដំណើរទៅ ហុងកុង លើកដំបូង ចាប់តាំងពីឆ្នាំ២០១៧