ព័ត៌មានអន្ដរជាតិ

រុស្ស៊ី បាញ់មីស៊ីលកម្ទេចទីតាំង ២ កន្លែងនៅភាគខាងត្បូង អ៊ុយក្រែន ស្លាប់ និងរបួសរាប់សិបនាក់

បានផុស

២ years មុន

នៅ

ថ្ងៃសៅរ៍ ២ កក្កដា ២០២២

ដោយ

សេវាសង្គ្រោះបន្ទាន់រដ្ឋរបស់អ៊ុយក្រែនបាននិយាយថា ការវាយប្រហារដោយមីស៊ីលនៅតំបន់កំពង់ផែ Odesa ភាគខាងត្បូងអ៊ុយក្រែនបានសម្លាប់មនុស្ស ២១ នាក់ និង ៣៩ នាក់ផ្សេងទៀតរងរបួស ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អាជ្ញាធរអ៊ុយក្រែនបាននិយាយថា យន្តហោះរុស្ស៊ីបានបាញ់មីស៊ីលចេញពីទិសដៅសមុទ្រខ្មៅ ហើយកាំជ្រួចមីស៊ីលមួយគ្រាប់បានហោះបុកផ្ទះល្វែង ៩ ជាន់មួយកន្លែង ហើយក្នុងពេលជាមួយគ្នានោះ មីស៊ីលមួយគ្រាប់ទៀតបានធ្លាក់ចូលទៅក្នុងកន្លែងបោះជំរុំនៅក្នុងទីប្រជុំជន Serhiivka កាលពីថ្ងៃសុក្រ ។

ទន្ទឹមនោះ វាក៏កើតឡើង ស្របពេលដែលទាហានរុស្ស៊ីកំពុងបន្តការវាយប្រហាររបស់ពួកគេនៅក្នុងខេត្ត Luhansk ភាគខាងកើតអ៊ុយក្រែន ដើម្បីព្យាយាមដណ្តើមយកទីតាំងដ៏រឹងមាំនៃតំបន់ Lysychansk ។

ស្របពេលជាមួយគ្នានេះ អ្នកនាំពាក្យក្រសួងការពារជាតិលោក Igor Konashenkov បាននិយាយថា វឌ្ឍនភាពរបស់យើងកំពុងមានដំណើរការល្អ ហើយកងទ័ពកំពុងបិទផ្លូវចូលនៅកណ្តាលទីក្រុង ។ លោកបាននិយាយថា កងកម្លាំងប្រដាប់អាវុធរុស្ស៊ីបន្តការវាយលុកដោយជោគជ័យក្នុងតំបន់ Lysychansk ។

ជាចុងក្រោយលោកបានបន្ថែមថា ក្នុងរយៈពេលប ៣ ថ្ងៃចុងក្រោយនេះ ពួកគេបានរឹបអូសយករោងចក្រចម្រាញ់ប្រេង និងរ៉ែ ខណៈដែលកងកម្លាំងសម្ព័ន្ធមិត្តបានចូលទៅជិតតំបន់ Lysychansk ហើយកងទ័ពអ៊ុយក្រែនកំពុងរងការខាតបង់យ៉ាងធ្ងន់ធ្ងរ ៕

ប្រែសម្រួលដោយ ៖ ជីវ័ន្ត

ប្រភព ៖ NHK