នាយករដ្ឋមន្រ្តីម៉ាឡេស៊ីនឹងទទួលការចាក់វ៉ាក់សាំងកូវីដមុនគេ

នាយករដ្ឋមន្រ្តីម៉ាឡេស៊ីលោក Muhyiddin Yassin នឹងស្ថិតក្នុងចំណោមបុគ្គលដំបូងគេនៅក្នុងប្រទេសដែលបានទទួលការចាក់វ៉ាក់សាំងកូវីដ ១៩ របស់ក្រុមហ៊ុន Pfizer ក្នុងគោលបំណងបង្ហាញទំនុកចិត្តដល់សាធារណជនថាវាមានសុវត្ថិភាព និងប្រសិទ្ធភាព ។

លោក Muhyiddin បាននិយាយថា វ៉ាក់សាំងនេះនឹងត្រូវផ្តល់ដំបូងឲ្យបុគ្គលិកសុខាភិបាលជួរមុខ បន្ទាប់មកអ្នកដែលស្ថិតក្នុងក្រុមដែលមានហានិភ័យឆ្លងខ្ពស់ដូចជា មនុស្សចាស់ជរា និងអ្នកជំងឺផ្លូវដង្ហើមរ៉ាំរ៉ៃជាដើម ។

លោក Muhyiddin បានធ្វើការប្រកាសនេះនៅក្នុងវីដេអូខ្លីមួយនៅថ្ងៃអង្គារ ទី២២ ខែធ្នូ នេះទាក់ទងនឹងការអភិវឌ្ឍ និងចែកចាយវ៉ាក់សាំងកូវីដ ១៩ ចុងក្រោយបំផុតដល់ប្រជាជនម៉ាឡេស៊ី ។

លោកបានមានប្រសាសន៍ថា “រដ្ឋាភិបាលនឹងធានានូវការផ្គត់ផ្គង់វ៉ាក់សាំងជាបន្ទាន់ ។ រដ្ឋាភិបាលរំពឹងថា ការផ្គត់ផ្គង់វ៉ាក់សាំងចំនួន ១ លានដូសដំបូងពីក្រុមហ៊ុន Pfizer នឹងត្រូវបានទទួល និងផ្តល់ការចាក់ដល់ក្រុមគោលដៅទាំងអស់ត្រឹមខែកុម្ភៈ ឆ្នាំ ២០២១ ខាងមុខនេះ” ។

កាលពីខែមុនប្រទេសម៉ាឡេស៊ីបានប្រកាសថា ខ្លួនបានយល់ព្រមទិញវ៉ាក់សាំងចំនួន ១២.៨ លានដូសពីក្រុមហ៊ុន Pfizer ។ ក្រោមកិច្ចព្រមព្រៀងនេះក្រុមហ៊ុន Pfizer នឹងចែកចាយវ៉ាក់សាំងចំនួន ១ លានដូសដំបូងក្នុងត្រីមាសទី ១ ឆ្នាំ ២០២១ ខណៈនៅត្រីមាសបន្តបន្ទាប់ម៉ាឡេស៊ីនឹងទទួលបានវ៉ា់សាំង ១.៧ លានដូស ៥.៨ លានដូស និង ៤.៣ លានដូស ។

គួរបញ្ជាក់ថា គិតត្រឹមពេលនេះប្រទេសម៉ាឡេស៊ីមានករណីឆ្លងជំងឺកូវីដ ១៩ ចំនួន ៩៥,៣២៧ ករណី និងមានអ្នកស្លាប់ចំនួន ៤៣៨ នាក់ ៕

ប្រែសម្រួលដោយ ៖ ជីវ័ន្ត

ប្រភព ៖ CNA

ចុចអាន ៖ រុស្ស៊ី អះអាងថា វ៉ាក់សាំងកូវីដរបស់ខ្លួនមានប្រសិទ្ធភាពខ្ពស់ប្រឆាំងនឹងវីរុសកូរ៉ូណាក្លាយប្រភេទថ្មី

ចុចអាន ៖ ក្រុមហ៊ុនចិន រៀបចំនាំចេញវ៉ាក់សាំងកូវីដ៤០០លានដូសចែកចាយទូទាំងពិភពលោក