ស៊ុយអែត សន្យាគោរពតាមកិច្ចព្រមព្រៀងជាមួយ តួកគី ដើម្បីណាតូ

នាយករដ្ឋមន្ត្រីស៊ុយអែតលោកស្រី Magdalena Andersson កាលពីថ្ងៃអាទិត្យបានប្តេជ្ញាថានឹងគោរពតាមកិច្ចព្រមព្រៀងថ្មីៗនេះជាមួយតួកគី រួមទាំងការសន្យាលើការធ្វើបត្យាប័នពួកភេរវករផងដែរ បន្ទាប់ពីបានចូលជាសមាជិករបស់អង្គការណាតូ ។

ថ្លែងនៅក្នុងព្រឹត្តិការណ៍នយោបាយប្រចាំឆ្នាំ Almedalen Week នៅទីក្រុង Gotland លោកស្រី Andersson បាននិយាយថា ទោះយ៉ាងណាលោកស្រីមិនអាចចែករំលែកព័ត៌មានលម្អិត ឬជាក់លាក់ណាមួយនៃអនុស្សរណៈដែលបានចុះហត្ថលេខាជាមួយតួកគី និងហ្វាំងឡង់ នៅមុនកិច្ចប្រជុំកំពូលរបស់អង្គការណាតូកាលពីថ្ងៃទី ២៨-៣០ នៅទីក្រុង Madrid នោះទេ ។

លោកស្រី Andersson បាននិយាយថា “អ្នកដែលមិនពាក់ព័ន្ធនឹងសកម្មភាពភេរវករ មិនចាំបាច់ព្រួយបារម្ភនោះទេ ។ ពលរដ្ឋស៊ុយអែតមិនអាចធ្វើបត្យាប័នបានដោយយោងតាមច្បាប់ជាតិ និងអន្តរជាតិនោះទេ ប្រសិនបើអ្នកមិនបានចូលរួមក្នុងសកម្មភាពភេរវករ” ។

ប្រទេសស៊ុយអែត និងហ្វាំងឡង់បានចាកចេញពីប្រទេសអព្យាក្រឹតភាព ហើយបានដាក់ពាក្យចូលរួមអង្គការណាតូក្នុងខែឧសភា ដែលជាការសម្រេចចិត្តមួយ ដោយសារតែសង្គ្រាមរបស់រុស្ស៊ីលើអ៊ុយក្រែន ។ ប៉ុន្តែតួកគីដែលជាសមាជិកយូរអង្វែងនៃសម្ព័ន្ធភាពមួយនេះបានសម្តែងការជំទាស់ចំពោះការប៉ុនប៉ងចូលជាសមាជិកភាព ដោយបានរិះគន់ប្រទេសនានាចំពោះការមិនប្រឆាំង និងថែមទាំងគាំទ្រក្រុមភេរវករទៀតផង ។

នៅមុនកិច្ចប្រជុំកំពូលនោះ, តួកគី ហ្វាំងឡង់ និងស៊ុយអែតបានចុះហត្ថលេខាលើកិច្ចព្រមព្រៀងនេះ បន្ទាប់ពីកិច្ចពិភាក្សា ៤ ផ្លូវនៅក្នុងរដ្ឋធានីអេស្ប៉ាញ ហើយកិច្ចព្រមព្រៀងនេះអនុញ្ញាតឲ្យប្រទេស Nordic ទាំងពីរក្លាយជាសមាជិកណាតូ ប៉ុន្តែដាក់លក្ខខណ្ឌឲ្យពួកគេចាត់វិធានការលើការព្រួយបារម្ភអំពីភេរវកម្មរបស់តួកគី និងដកការហាមឃាត់អាវុធលើទីក្រុងអង់ការ៉ាជាដើម ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ អង់គ្លេស សន្យាធ្វើគ្រប់យ៉ាងដើម្បីឲ្យ អ៊ុយក្រែន ឈ្នះសង្គ្រាម