រដ្ឋមន្រ្តីការបរទេស អាមេរិក នឹងមកប្រទេសអាស៊ានចំនួន ២ នៅសប្ដាហ៍នេះ

ក្រសួងការបរទេសអាមេរិកបាននិយាយកាលពីថ្ងៃអង្គារថា រដ្ឋមន្ត្រីការបរទេសសហរដ្ឋអាមេរិកលោក Antony Blinken នឹងធ្វើដំណើរទៅកាន់កោះបាលីរបស់ប្រទេសឥណ្ឌូណេស៊ី និងទីក្រុងបាងកកប្រទេសថៃក្នុងសប្តាហ៍នេះ ។

លោក Blinken នឹងធ្វើដំណើរទៅកោះបាលីនៅថ្ងៃពុធនេះដើម្បីចូលរួមកិច្ចប្រជុំរដ្ឋមន្ត្រីការបរទេស G20 ខណៈដែលអ្នកនាំពាក្យលោក Ned Price បាននិយាយថា លោក Blinken នឹងពង្រឹងការប្តេជ្ញាចិត្តរបស់សហរដ្ឋអាមេរិកក្នុងការធ្វើការជាមួយដៃគូអន្តរជាតិដើម្បីដោះស្រាយបញ្ហាប្រឈមជាសកល រួមទាំងអសន្តិសុខស្បៀងអាហារ និងថាមពល ក៏ដូចជាការគំរាមកំហែងនៃការបន្តសង្គ្រាមរបស់រុស្ស៊ីប្រឆាំងនឹងអ៊ុយក្រែនជាដើម ។

លោក Price បាននិយាយថា លោក Blinken ក៏នឹងរៀបចំកិច្ចប្រជុំទ្វេភាគីជាមួយរដ្ឋមន្ត្រីការបរទេសឥណ្ឌូណេស៊ីលោកស្រី Retno Marsudi ផងដែរ ខណៈនៅទីក្រុងបាងកក លោក Blinken នឹងជួបជាមួយលោកនាយករដ្ឋមន្ត្រី Prayut Chan-o-cha រួមជាមួយឧបនាយករដ្ឋមន្ត្រី និងជារដ្ឋមន្ត្រីការបរទេសលោក Don Pramudwinai ។

អ្នកនាំពាក្យរូបនេះបាននិយាយទៀតថា “លោក Blinken ក៏ទន្ទឹងរង់ចាំពិភាក្សាអំពីបញ្ហាជាច្រើន រួមទាំងការកសាងភាពជោគជ័យនៃរបៀបវារៈកិច្ចប្រជុំមេដឹកនាំសេដ្ឋកិច្ច APEC ឆ្នាំ ២០២២ ដែលថៃធ្វើជាម្ចាស់ផ្ទះ ការពង្រីកកិច្ចសហប្រតិបត្តិការផ្នែកសុខភាព និងអាកាសធាតុ ក៏ដូចជាការដោះស្រាយវិបត្តិនៅក្នុងប្រទេសមីយ៉ាន់ម៉ាផងដែរ ។

ជាចុងក្រោយលោក Ned Price បានបញ្ជាក់ថា “លោក Blinken ក៏នឹងជួបជាមួយអតីតនិស្សិតសហរដ្ឋអាមេរិក ទស្សនាមជ្ឈមណ្ឌលប្រតិបត្តិការសង្គ្រោះបន្ទាន់របស់នាយកដ្ឋានគ្រប់គ្រងជំងឺថៃ និងទស្សនាកន្លែងស្នាក់នៅ និងមជ្ឈមណ្ឌលសុខុមាលភាពសម្រាប់ជនរងគ្រោះនៃការជួញដូរមនុស្សជាដើម” ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ សង្គ្រាមសម្ងាត់របស់ អាមេរិក ត្រូវបានលាតត្រដាង