ព័ត៌មានអន្ដរជាតិ
អ្វីទៅជាក្រុមប្រទេស G20 ដែលពិភពលោកដាក់ក្ដីសង្ឃឹមដើម្បីដោះស្រាយ វិបត្តិសេដ្ឋកិច្ចសកល
ប្រព័ន្ធពាណិជ្ជកម្មសកលកំពុងស្ថិតក្នុងស្ថានភាពលំបាក ការងើបឡើងវិញនៃសេដ្ឋកិច្ចសកល និងការធ្វើពាណិជ្ជកម្ម គឺជាបន្ទុកដែលលើសពីសមត្ថភាពគ្រប់គ្រងរបស់សហរដ្ឋអាមេរិក និងក្រុមប្រទេស G7 ។ ក្ដីសង្ឃឹមតែមួយគត់របស់ពិភពលោកគឺ G20 សម្រាប់ការសម្របសម្រួលគោលនយោបាយ ដើម្បីទប់ស្កាត់បញ្ហាអតិផរណា ការរំខាននៅក្នុងខ្សែសង្វាក់ផ្គត់ផ្គង់ ការបែកបាក់ផ្នែកភូមិសាស្ត្រនយោបាយ និងវិបត្តិសេដ្ឋកិច្ចនៅក្នុងសកលលោក ។
G20 មានពាក្យពេញជាភាសាអង់គ្លេសថា The Group of Twenty ឬ ប្រទេសដែលមានសេដ្ឋកិច្ចធំទាំង ២០ របស់ពិភពលោក គឺជាកិច្ចប្រជុំពហុភាគីលើយុទ្ធសាស្ត្រដែលតភ្ជាប់ប្រទេសអភិវឌ្ឍន៍ និងសេដ្ឋកិច្ចឈានមុខគេដែលកំពុងរីកចម្រើននៅក្នុងពិភពលោក ។ G20 មានតួនាទីជាយុទ្ធសាស្ត្រក្នុងការធានានូវកំណើនសេដ្ឋកិច្ចពិភពលោកនាពេលអនាគត និងវិបុលភាពនៃពិភពលោកទាំងមូល ។ សមាជិក G20 រួមបញ្ចូលគ្នាទាំងអស់មានផលិតផលសរុបជាង ៨៥ ភាគរយនៃផលិតផលសរុបរបស់ពិភពលោក, ៧៥ ភាគរយនៃពាណិជ្ជកម្មអន្តរជាតិ និង ៦០ ភាគរយនៃចំនួនប្រជាជនពិភពលោក ។ G20 មានគោលបំណងសំខាន់មួយគឺ ដើម្បីសម្រេចបាននូវកំណើនសេដ្ឋកិច្ចពិភពលោកប្រកបដោយស្ថិរភាព និងរឹងមាំសម្រាប់ផលប្រយោជន៍ទូទាំងសកលដោយគ្មានការរំលងប្រទេសណាមួយ ក្នុងបណ្តាប្រទេសនៅលើពិភពលោកឡើយ ។
ក្រុមប្រទេស G20 ត្រូវបានបង្កើតឡើងនៅឆ្នាំ ១៩៩៩ បន្ទាប់ពីវិបត្តិហិរញ្ញវត្ថុអាស៊ីបានបង្ហាញពីភាពចាំបាច់ក្នុងការលើកកម្ពស់កិច្ចសហប្រតិបត្តិការសេដ្ឋកិច្ចសកល ។ ដោយសារតែក្រុមប្រទេស G7 ដែលជាក្លិបពិសេសមួយសម្រាប់ប្រទេសអភិវឌ្ឍន៍ភាគច្រើនក្នុងពិភពលោកមិនបានរួមបញ្ចូលមហាអំណាចមួយចំនួនដូចជា ចិន ឥណ្ឌា និងប្រេស៊ីលដែលកំពុងដើរតួនាទីសំខាន់កាន់តែខ្លាំងនោះឡើយ ។ ដំបូងឡើយក្រុមប្រទេសនេះបានរៀបចំតែកិច្ចប្រជុំផ្នែកបច្ចេកទេសក្នុងចំណោមរដ្ឋមន្ត្រីប៉ុណ្ណោះ ប៉ុន្តែក្រោយមានវិបត្តិហិរញ្ញវត្ថុកាលពីឆ្នាំ ២០០៨ មក G20 ត្រូវបានធ្វើបច្ចុប្បន្នភាពឲ្យមានកិច្ចប្រជុំកម្រិតមេដឹកនាំប្រទេសក្នុងគោលបំណងលុបបំបាត់ការដួលរលំប្រព័ន្ធហិរញ្ញវត្ថុពិភពលោក។
បច្ចុប្បន្ន G20 មានសមាជិកដូចជា អាហ្សង់ទីន អូស្ត្រាលី ប្រេស៊ីល កាណាដា ចិន បារាំង អាល្លឺម៉ង់ ឥណ្ឌា ឥណ្ឌូណេស៊ី អ៊ីតាលី ជប៉ុន កូរ៉េខាងត្បូង ម៉ិកស៊ិក រុស្ស៊ី អារ៉ាប៊ីសាអូឌីត អាហ្រ្វិកខាងត្បូង តួកគី ចក្រភពអង់គ្លេស សហរដ្ឋអាមេរិក និងសហភាពអឺរ៉ុប ខណៈអេស្ប៉ាញក៏ត្រូវបានអញ្ជើញជាភ្ញៀវអចិន្ត្រៃយ៍ផងដែរ ។
រៀងរាល់ឆ្នាំ គណៈប្រធានបានអញ្ជើញប្រទេសជាភ្ញៀវឲ្យចូលរួមពេញអង្គនៅក្នុងកិច្ចសហប្រតិបត្តិការ G20 ក្នុងនោះមានដូចជាអង្គការអន្តរជាតិ និងតំបន់មួយចំនួនក៏បានចូលរួមផងដែរ ដែលធ្វើឲ្យកិច្ចប្រជុំនេះកាន់តែទូលំទូលាយ ។
ប្រធាន G20 ប្រព្រឹត្តទៅដោយវិលជុំក្នុងមួយឆ្នាំម្ដង នៅក្នុងចំណោមសមាជិករបស់ខ្លួន ។ ប្រទេសដែលកាន់តំណែងជាប្រធាន ធ្វើការរួមគ្នាជាមួយអ្នកកាន់តំណែងមុន និងអ្នកស្នងតំណែងបន្ទាប់ ឬហៅម្យ៉ាងទៀតថា Troika ដើម្បីធានាបាននូវការបន្តនៃរបៀបវារៈ ។ អ៊ីតាលីទើបបានបញ្ចប់តំណែង ហើយឥណ្ឌូណេស៊ីជាប្រធានក្នុងពេលបច្ចុប្បន្ន ខណៈឥណ្ឌាគឺជាប្រទេស Troika បន្ទាប់ពីឥណ្ឌូណេស៊ី ។ អ្វីដែលគួរឲ្យកត់សម្គាល់នោះ G20 មិនមានលេខាធិការដ្ឋានអចិន្ត្រៃយ៍ទេ ។
កិច្ចប្រជុំកំពូលរបស់ G20 ក្នុងតំណែងវិលជុំនីមួយៗ គឺជាសេចក្តីថ្លែងការណ៍ដែលបង្ហាញពីការប្តេជ្ញាចិត្ត និងចក្ខុវិស័យរបស់សមាជិកសម្រាប់ពេលអនាគត ដោយព្រាងចេញពីអនុសាសន៍ដែលបានជ្រើសរើស និងអាចផ្តល់បានពីកិច្ចប្រជុំថ្នាក់រដ្ឋមន្ត្រី និងការងារផ្សេងទៀត ។ កិច្ចប្រជុំកំពូលប្រចាំឆ្នាំជាបឋមជជែកអំពីគោលនយោបាយហិរញ្ញវត្ថុ និងសេដ្ឋកិច្ចតែកិច្ចប្រជុំនេះក៏ជាឱកាសមួយសម្រាប់មេដឹកនាំក្រុមផ្សេងៗចំណាយពេលវេលា និងដោះស្រាយបញ្ហាសំខាន់ៗនាពេលបច្ចុប្បន្នរាប់ចាប់ពីវិបត្តិភូមិសាស្ត្រនយោបាយរហូតដល់ការប្រែប្រួលអាកាសធាតុផងដែរ ។
កិច្ចប្រជុំកំពូលប្រមុខរដ្ឋ និងរដ្ឋាភិបាល G20 លើកទី ១៧ នឹងប្រព្រឹត្តទៅនៅថ្ងៃទី ១៥ ខែវិច្ឆិកា ដល់ថ្ងៃទី១៦ ខែវិច្ឆិកា ឆ្នាំ២០២២ នៅកោះបាលី ។ ប្រធានាធិបតីឥណ្ឌូណេស៊ី លោក ចូកូ វីដូដូ មិនបានលុបចោលការអញ្ជើញរបស់ខ្លួនទៅកាន់រុស្ស៊ីឡើយ ហើយកាលពីដើមខែមេសា កន្លងទៅនេះ លោក វីដូដូ បានប្រកាសថា លោកបានទូរស័ព្ទទៅប្រធានាធិបតីអ៊ុយក្រែនដើម្បីអញ្ជើញលោកឲ្យមកចូលរួមជាមួយមេដឹកនាំពិភពលោក ផ្សេងទៀត នៅក្នុងកិច្ចប្រជុំកំពូល G20 ក្នុងឋានៈជាភ្ញៀវកិត្តិយស ។ ការអញ្ជើញនេះប្រហែលជាឥណ្ឌូណេស៊ីមានគោលបំណងចង់ឲ្យឱ្យមានការចរចាសន្តិភាពរវាងរុស្ស៊ី និងអ៊ុយក្រែនក្នុងការបញ្ចប់សង្គ្រាម ។
គួបញ្ជាក់ថា របៀបវារៈសម្រាប់កិច្ចប្រជុំកំពូល G20 ដែលប្រទេសឥណ្ឌូនេស៊ីធ្វើជាប្រធាននៅឆ្នាំនេះ នឹងផ្តោតលើការនាំមកនូវផលប្រយោជន៍ជាច្រើនដល់បណ្ដាប្រទេសកំពុងអភិវឌ្ឍ និងការស្តារឡើងវិញប្រកបដោយសមធម៌ និងនិរន្តរភាព ។ ឥណ្ឌូណេស៊ីអាចនឹងធ្វើការកសាងស្ពានដើម្បីភ្ជាប់ទំនាក់ទំនងរវាងប្រទេសអភិវឌ្ឍ និងប្រទេសកំពុងអភិវឌ្ឍដែលជាកម្លាំងរួមនៅក្នុងក្រុមប្រទេស G20 ។ ចំពោះឥណ្ឌូនេស៊ីគឺមិនសូវរវីរវល់លើរឿងនយោបាយរបស់ប្រទេសមហាអំណាចឡើយ ដែលនេះក៏ដោយសារតែប្រទេសនេះបានប្រកាន់យកជំហរមិនចូលបក្សសម្ព័ន្ធយ៉ាងម៉ឺងម៉ាត់ ៕
អត្ថបទ ៖ សេម វាសនា
ចុចអាន ៖ រដ្ឋមន្រ្តីការបរទេស អាមេរិក នឹងមកប្រទេសអាស៊ានចំនួន ២ នៅសប្ដាហ៍នេះ
ធ្លាយរូបភាព Liu Yifei ណាត់ជួបមនុស្សប្រុសទាំងកណ្តាលអធ្រាត្រ
អាជ្ញាធរខណ្ឌចំការមន កំពុងសិក្សាគម្រោងលើសង្កាត់ទួលទំពូងទី ០១ និង ទួលទំពូងទី ០២ ចំពោះផ្លូវខូចៗ មានទឹកលិច
វៀតណាម បំបែកសម្បុកក្រុមលាងលុយកខ្វក់ ក្នុងទំហំទឹកប្រាក់ ១,២ពាន់លានដុល្លារ
សិល្បៈទស្សនីយភាព «ល្ខោនបាមោជ្ជទ័យ» ទទួលការចាប់អារម្មណ៍ខ្លាំង ខណៈសំបុត្រទស្សនាថ្ងៃនេះ និងថ្ងៃសៅរ៍ លក់អស់ហើយ
ក្រសួងអប់រំ នឹងបន្តពង្រឹងកិច្ចសហប្រតិបត្តិការវិស័យអប់រំជាមួយសាកលវិទ្យាល័យប៉េកាំង
ត្រាំ ផ្តាំទៅ ពូទីន! ចង់បានធម៌ក្តៅឬធម៌ត្រជាក់?
កូរ៉េខាងជើង ប្រហារជីវិតអ្នកស្រាវជ្រាវជាន់ខ្ពស់ ព្រោះគម្រោងថាមពលនុយក្លេអ៊ែរបរាជ័យ
អ្នកនាំពាក្យ៖ ករណីពលរដ្ឋទៅទទួលអំណោយនៅមុខភូមិគ្រឹះអ្នកឧកញ៉ា សុខ គង់ ស្លាប់៤នាក់ ខណៈ៥នាក់ទៀតកំពុងសង្គ្រោះ
នេះជាខ្លឹមសារនៃសំបុត្រ ដែលលោក បៃដិន ទុកឲ្យ ត្រាំ ពេលផុតតំណែង
កម្លាំងចម្រុះ នៃស្នងការរាជធានី បន្តដាក់គោលដៅត្រួតពិនិត្យជាតិស្រវឹង នៅលើកំណាត់ផ្លូវ ៦០ ម៉ែត្រ
-
ចរាចរណ៍៣ ថ្ងៃ agoបុរសម្នាក់ សង្ស័យបើកម៉ូតូលឿន ជ្រុលបុករថយន្តបត់ឆ្លងផ្លូវ ស្លាប់ភ្លាមៗ នៅផ្លូវ ៦០ ម៉ែត្រ
-
ព័ត៌មានអន្ដរជាតិ៦ ថ្ងៃ agoទើបធូរពីភ្លើងឆេះព្រៃបានបន្តិច រដ្ឋកាលីហ្វ័រញ៉ា ស្រាប់តែជួបគ្រោះធម្មជាតិថ្មីទៀត
-
សន្តិសុខសង្គម៣ ថ្ងៃ agoពលរដ្ឋភ្ញាក់ផ្អើលពេលឃើញសត្វក្រពើងាប់ច្រើនក្បាលអណ្ដែតក្នុងស្ទឹងសង្កែ
-
កីឡា១ សប្តាហ៍ agoភរិយាលោក អេ ភូថង បដិសេធទាំងស្រុងរឿងចង់ប្រជែងប្រធានសហព័ន្ធគុនខ្មែរ
-
ព័ត៌មានជាតិ៦ ថ្ងៃ agoលោក លី រតនរស្មី ត្រូវបានបញ្ឈប់ពីមន្ត្រីបក្សប្រជាជនតាំងពីខែមីនា ឆ្នាំ២០២៤
-
ព័ត៌មានអន្ដរជាតិ១ សប្តាហ៍ agoឆេះភ្នំនៅថៃ បង្កការភ្ញាក់ផ្អើលនិងភ័យរន្ធត់
-
ព័ត៌មានជាតិ៧ ថ្ងៃ agoអ្នកតាមដាន៖មិនបាច់ឆ្ងល់ច្រើនទេ មេប៉ូលីសថៃបង្ហាញហើយថាឃាតកម្មលោក លិម គិមយ៉ា ជាទំនាស់បុគ្គល មិនមានពាក់ព័ន្ធនយោបាយកម្ពុជាឡើយ
-
ចរាចរណ៍៤ ថ្ងៃ agoសង្ស័យស្រវឹង បើករថយន្តបុកម៉ូតូពីក្រោយរបួសស្រាលម្នាក់ រួចគេចទៅបុកម៉ូតូ ១ គ្រឿងទៀត ស្លាប់មនុស្សម្នាក់