ស្លាប់កើនដល់១៥នាក់ ក្នុងការវាយប្រហារដោយមីស៊ីលរុស្ស៊ី លើអគារលំនៅដ្ឋាន អ៊ុយក្រែន

ក្រុមអ្នកជួយសង្គ្រោះ បានរកឃើញសាកសពចំនួន១៥នាក់ បន្ទាប់ពីមីស៊ីលរបស់រុស្ស៊ី បានវាយប្រហារទៅលើអគារលំនៅដ្ឋានមួយក្នុងទីក្រុង Chasiv Yar ភាគខាងកើតប្រទេសអ៊ុយក្រែន កាលពីថ្ងៃសៅរ៍ទី០៩ខែកក្កដា។

សាខាក្នុងស្រុក នៃសេវាសង្គ្រោះបន្ទាន់អ៊ុយក្រែន បាននិយាយនៅលើ Facebook ថា “ក្នុងអំឡុងពេលប្រតិបត្តិការជួយសង្គ្រោះ សាកសពចំនួន ១៥នាក់ត្រូវបានគេរកឃើញនៅកន្លែងកើតហេតុ ហើយមនុស្ស ៥ នាក់ត្រូវបានទាញចេញពីគំនរបាក់បែកទាំងរស់”។

កិច្ចខិតខំប្រឹងប្រែងជួយសង្គ្រោះ កំពុងធ្វើឡើង បន្ទាប់ពីមីស៊ីលរុស្ស៊ី បានបំផ្លាញអគារផ្ទះល្វែងកម្ពស់ប្រាំជាន់។

លោក Pavlo Kyrylenko អភិបាលនៃតំបន់ Donetsk បាននិយាយថា មនុស្សចំនួន៣០នាក់ នៅតែជាប់ក្នុងគំនរបាក់បែក ក្រោយការវាយប្រហារ។

គួរបញ្ជាក់ថា Chasiv Yar ស្ថិតនៅចម្ងាយប្រហែល ២០ គីឡូម៉ែត្រភាគអាគ្នេយ៍នៃទីក្រុង Kramatorsk ដែលជាទីក្រុងមួយ ត្រូវបានគេរំពឹងថា ជាគោលដៅសំខាន់សម្រាប់កងកម្លាំងរុស្ស៊ីដែលកំពុងឆ្ពោះដំណើរទៅទិសខាងលិច៕

ប្រែសម្រួល៖ Vann Vann

ប្រភព៖ Al Jazeera

ចុចអាន៖ អង់គ្លេស ចាប់ផ្តើមបង្វឹកទាហានអ៊ុយក្រែន ក្នុងកម្មវិធីបណ្តុះបណ្តាលយោធាថ្មី