ថ្ងៃនេះលោក ប្រាយុទ្ធ កាន់ទុក្ខលោក អាបេ និងបញ្ជាឲ្យបង្ហូតទង់ជាតិ ពាក់កណ្ដាលដងទូទាំងប្រទេស

នាយករដ្ឋមន្ត្រីថៃ លោក ប្រាយុទ្ធ ចាន់អូចា បានបញ្ជាគ្រប់ក្រសួងស្ថាប័នរបស់រដ្ឋាភិបាល និងសហគ្រាសរដ្ឋទាំងអស់នៅទូទាំងប្រទេស ឲ្យបង្ហូតទង់ជាតិត្រឹម​ពាក់កណ្តាលដង​រយៈពេល ​១ ​ថ្ងៃគឺ​នៅ​ថ្ងៃ​ចន្ទ ទី​១១ ខែកក្កដា ឆ្នាំ​២០២២ នេះ ដើម្បីកាន់ទុក្ខអតីតនាយករដ្ឋមន្ត្រីជប៉ុនលោក អាបេ ស៊ីនហ្សូ ។

ទន្ទឹមនោះលោក ថាណាខន អ្នកនាំពាក្យប្រចាំទីស្តីការនាយករដ្ឋមន្ត្រីបានឲ្យដឹងថា បន្ទាប់មកលោកនាយករដ្ឋមន្ត្រី​ក៏នឹង​ធ្វើដំណើរ​ទៅ​ចុះហត្ថលេខា​លើ​សៀវភៅ​រំលែក​ទុក្ខ​នៅ​ស្ថានទូត​ជប៉ុន​ប្រចាំ​ប្រទេស​ថៃ​នៅថ្ងៃអង្គារទី១២ ខែកក្កដា ឆ្នាំ២០២២ ផងដែរ ។

គួរបញ្ជាក់ថា អតីតនាយករដ្ឋមន្ត្រីជប៉ុនលោក Abe Shinzo ត្រូវបានខ្មាន់កាំភ្លើងឈ្មោះ Yamagami Tetsuya អាយុ ៤១ ឆ្នាំដើរចូលបាញ់សម្លាប់ពីខាងក្រោយ អំឡុងពេលលោកថ្លែងសុន្ទរកថាតាមដងផ្លូវនៅទីក្រុង Nara ភាគខាងលិចប្រទេសជប៉ុន ខណៈភ្លាមៗនោះប៉ូលិសក៏បានចាប់ខ្លួនជនដៃដល់នៅនឹងកន្លែងកើតហេតុផងដែរ ៕

ប្រែសម្រួលដោយ ៖ គង់ សំអាន

ប្រភព ៖ Matichon

ចុចអាន ៖ មកដឹងចន្លោះពេលដែលជនដៃដល់បាញ់គ្រាប់ទី ២ សម្លាប់លោក Abe