​អ្នក​ស្លាប់ក្នុង​ការ​វាយប្រហារ​ដោយ​ ​រ៉ុកកែត​របស់​រុ​ស្ស៊ី​ លើ​ប្លុកផ្ទះល្វែងអ៊ុយក្រែន ​កើន​ដល់​៣០​នាក់

មន្ត្រីម្នាក់មកពីការិយាល័យប្រធានាធិបតី Volodymyr Zelensky បាននិយាយថា ចំនួនអ្នកស្លាប់ក្នុងការវាយប្រហារដោយគ្រាប់រ៉ុកកែតរបស់រុស្ស៊ី លើប្លុកផ្ទះល្វែងមួយកន្លែងនៅភាគខាងកើតប្រទេសអ៊ុយក្រែនកាលពីចុងសប្តាហ៍ បានកើនឡើងដល់៣០នាក់ហើយ ខណៈក្រុមអ្នកជួយសង្គ្រោះ កំពុងស្វែងរកអ្នកនៅរស់រានមានជីវិត ក្នុងអគារបាក់បែក។

លោក Kyrylo Tymoshenko អនុប្រធានការិយាល័យរបស់លោក Zelenskyy ក៏បាននិយាយដែរថា ក្រុមអ្នកជួយសង្គ្រោះឥឡូវនេះ បានបោសសម្អាត ៦៥ ភាគរយនៃកម្ទេចកម្ទី នៅសេសសល់នៃអគារកម្ពស់ប្រាំជាន់ ដែលបានដួលរលំកាលពីល្ងាចថ្ងៃសៅរ៍ទី០៩ខែកក្កដា ក្នុងទីក្រុង Chasiv Yar នៃតំបន់ Donetsk ។

រុស្ស៊ី ​បាន​បដិសេធ​ម្តង​ហើយ​ម្តង​ទៀត​ចំពោះ​ការ​កំណត់​គោលដៅ​ជន​ស៊ីវិល ​ជា​ផ្នែក​មួយ​នៃ​ការ​វាយលុក​របស់​ខ្លួន។ ក្រសួងការពារជាតិរបស់ប្រទេសនេះ បាននិយាយកាលពីថ្ងៃចន្ទថា “អាវុធបាញ់ចេញពីដីគោក បានបំផ្លាញទីតាំងដាក់ពង្រាយបណ្តោះអាសន្ន នៃអង្គភាពការពារដែនដីអ៊ុយក្រែនក្នុងទីក្រុង Chasiv Yar”៕

ប្រែសម្រួល៖ Vann Vann

ប្រភព៖ Al Jazeera

ចុចអាន៖ អ៊ុយក្រែន គ្រោងប្រមូលកម្លាំងប្រយុទ្ធ ១លាននាក់ និង ប្រើ សព្វាវុធ លោកខាងលិច ដើម្បី វាយយក ទឹកដី មកវិញ