អ៊ុយក្រែន វាយប្រហារសម្លាប់មនុស្ស ៧នាក់ និងរបួស ៤០នាក់ នៅតំបន់ Kherson

ប្រមុខរដ្ឋបាលយោធា-ស៊ីវិលរបស់ទីក្រុង លោក Vladimir Leontyev បានប្រាប់ Sputnik កាលពីថ្ងៃអង្គារទី១២ខែកក្កដាថា ចំនួនអ្នកស្លាប់បន្ទាប់ពីការវាយប្រហាររបស់អ៊ុយក្រែន លើទីក្រុង Nova Kakhovka ក្នុងតំបន់ Kherson បានកើនឡើងដល់ ៧ នាក់ហើយ។ លោកបន្ថែមថាមនុស្សប្រហែល ៤០នាក់ទៀត ក៏បានរងរបួសផងដែរ។

លើសពីនេះ លោក Leontyev បានប្រៀបធៀបការវាយប្រហារនេះ ទៅនឹងការផ្ទុះក្នុងទីក្រុង បេរូត នៃប្រទេសលីបង់ កាលពីឆ្នាំ ២០២០ នៅពេល សូម្បីតែអំបិលក៏ផ្ទុះដែរ។

នៅពេលព្រឹកព្រលឹម លោកបានប្រាប់ Sputnik ថា ក្មេងជំទង់ពិការម្នាក់ ដែលបំពេញកាតព្វ​កិច្ចនៅឃ្លាំងដាក់ជំនួយមនុស្សធម៌ គឺស្ថិតក្នុងចំណោមអ្នកស្លាប់ក្នុងការវាយប្រហារនេះ។

យោងតាមលោក Leontyev, ការវាយប្រហារនៅ Novaya Kakhovka ត្រូវបានធ្វើឡើងនាយប់ថ្ងៃចន្ទ ដែលបណ្តាលឲ្យមានការផ្ទុះនៅឃ្លាំងស្តុកទំនិញ និងធ្វើឲ្យខូចខាតដល់មន្ទីរពេទ្យក្នុងស្រុក និងផ្ទះល្វែងរាប់រយនៅក្នុងប្លុកអគារលំនៅដ្ឋាន។

ការវាយប្រហារនេះ ត្រូវបានគេអះអាងថា ប្រើប្រាស់ប្រព័ន្ធបាញ់គ្រាប់រ៉ុកកែត HIMARS (High Mobility Artillery Rocket System) ដែលផ្គត់ផ្គង់ដោយសហរដ្ឋអាមេរិក៕

ប្រែសម្រួល៖ Vann Vann

ប្រភព៖ Sputnik

ចុចអាន៖ ញូវយ៉ក ប្រាប់ពលរដ្ឋឲ្យអនុវត្តវិធានការ ៣ចំណុច បើ រុស្ស៊ី វាយប្រហារនុយក្លេអ៊ែរ