រដ្ឋមួយ របស់អាមេរិក ប្រកាសអាសន្ន ដោយសារទឹកជំនន់ 

មនុស្សជាង ៤០ នាក់បានបាត់ការទាក់ទង នៅក្នុង Buchanan នៃរដ្ឋ Virginia កាលពីថ្ងៃពុធទី១៣ខែកក្កដា បន្ទាប់ពីព្យុះដ៏ខ្លាំងមួយ បានវាយប្រហារតំបន់នេះ ដោយនាំមកនូវភ្លៀងធ្លាក់ខ្លាំង និងទឹកជំនន់។

ទោះបីជាយ៉ាងណាក៏ដោយ ក្រុមមន្ត្រីបាននិយាយនៅក្នុងសន្និសីទសារព័ត៌មានថា មិនមានអ្នកស្លាប់ត្រូវបានបញ្ជាក់នោះទេ។

ការិយាល័យតម្រួតតំបន់ Buchanan បានឲ្យដឹងថា មានបុគ្គលចំនួន ៤៤ នាក់បានបាត់ការទាក់ទង ប៉ុន្តែបានសង្កត់ធ្ងន់ថា នេះមិនមែនមានន័យថា មនុស្សបាត់ខ្លួននោះទេ វាមានន័យថា យើងកំពុងព្យាយាមចូលទៅដល់ និងកំណត់ទីតាំងមនុស្សទាំងនោះ ហើយពិនិត្យមើលសុខុមាលភាពរបស់ពួកគេ។

យ៉ាងណាក្តី កិច្ចខិតខំប្រឹងប្រែងស្វែងរក និងជួយសង្គ្រោះកំពុងបន្ត។

តំបន់ Buchanan ស្ថិតនៅព្រំប្រទល់នៃរដ្ឋ Virginia រដ្ឋ West Virginia និងរដ្ឋ Kentucky ។

ភ្លៀង​ធ្លាក់​កម្រិតពី​៤​ទៅ​៦​អ៊ី​ញ ​បាន​វាយប្រហារ​តំបន់​នេះ​ក្នុង​រយៈពេល​ប៉ុន្មាន​ម៉ោង ​ពេញ​មួយ​យប់។ កន្លែងរងផលប៉ះពាល់អាក្រក់បំផុត គឺនៅផ្នែកខាងក្រោមនៃខ្សែទឹកហូរ។

ស្របពេលជាមួយគ្នានោះដែរ អភិបាលរដ្ឋ Virginia លោក Glenn Youngkin បានប្រកាសដាក់រដ្ឋក្នុងគ្រាអាសន្ន។

លោកបាននិយាយនៅក្នុងសេចក្តីថ្លែងការណ៍មួយថា “ខ្ញុំចង់ឲ្យអ្នករដ្ឋ Virginia នៅក្នុងតំបន់ Buchanan ដឹងថា យើងកំពុងរកធនធានទាំងអស់ ដើម្បីជួយអ្នកដែលរងផលប៉ះពាល់ដោយសារព្យុះនេះ។ ស្របពេលយើងបន្តវាយតម្លៃស្ថានភាព ខ្ញុំចង់អរគុណអ្នកឆ្លើយតបដំបូងរបស់យើង និងបុគ្គលិកជួរមុខទាំងអស់ សម្រាប់ការផ្តល់ជំនួយជាមួយ ប្រតិបត្តិការដែលកំពុងបន្ត”៕

ប្រែសម្រួល៖ Vann Vann

ប្រភព៖ ABC​ News

ចុចអាន៖ ស្លាប់កើនដល់១០០នាក់ហើយ ក្នុងគ្រោះធម្មជាតិនៅ ប្រេស៊ីល