បាតុកម្មនៅ ស្រីលង្កា បណ្តាលឲ្យមនុស្សស្លាប់និងរបួសជិត ១០០នាក់ 

មនុស្សម្នាក់បានស្លាប់ និង ៨៤ នាក់ផ្សេងទៀតរងរបួស បន្ទាប់ពីការតវ៉ា បានអង្រួនរដ្ឋធានី កូឡុំបូ របស់ប្រទេសស្រីលង្កា កាលពីថ្ងៃពុធទី១៣ខែកក្កដា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បុរសអាយុ២៦ឆ្នាំម្នាក់បានស្លាប់ដោយសារថប់ដង្ហើម បន្ទាប់ពីកងកម្លាំងប៉ូលិស បាញ់ឧស្ម័នបង្ហូរទឹកភ្នែកទៅលើក្រុមអ្នកតវ៉ា។

លោកនាយករដ្ឋមន្ត្រី Ranil Wickremesinghe ត្រូវបានតែងតាំងជាប្រធានាធិបតីស្តីទីរបស់ស្រីលង្កា បន្ទាប់ពីលោកប្រធានាធិបតី Gotabaya Rajapaksa ភៀសខ្លួនចេញពីប្រទេស។ ប៉ុន្តែ​ការ​សម្រេច​នេះ ​បាន​បង្កឲ្យ​មាន​ការ​តវ៉ា​បន្ថែម​ទៀត​ ទាមទារឲ្យ​លោក​ចុះ​ចេញ​ពី​តំណែង។

គ្រូពេទ្យនៅមន្ទីរពេទ្យជាតិកូឡុំបូ បាននិយាយថា អ្នករងរបួស គឺមកពីក្រុមបាតុករដែលស្ថិតនៅខាងក្រៅការិយាល័យនាយករដ្ឋមន្ត្រី ក៏ដូចជាអ្នកដែលនៅខាងក្រៅរដ្ឋសភា នាពេលល្ងាចផងដែរ។

ប៉ូលិសបានបាញ់ឧស្ម័នបង្ហូរទឹកភ្នែកទៅលើក្រុមបាតុករ ដែលប៉ុនប៉ងទម្លុះទ្វារការិយាល័យនាយករដ្ឋមន្ត្រីក្នុងទីក្រុង កូឡុំបូ។ បន្ទាប់ពីចូលក្នុងបាន ពួកគេក៏បន្តដំណើរឆ្ពោះទៅកាន់រដ្ឋសភា។

អ្នកនាំពាក្យយោធាបានប្រាប់ BBC ថា ទាហាន និងប៉ូលិសម្នាក់ ស្ថិតក្នុងចំណោមអ្នករងរបួស ហើយបានចោទប្រកាន់ថា កាំភ្លើងដែលមានគ្រាប់ ត្រូវបានក្រុមបាតុករលួច ហើយមិនទាន់រកឃើញនៅឡើយទេ។

រដ្ឋាភិបាលបាននិយាយនៅក្នុងសេចក្តីថ្លែងការណ៍មួយថា នៅព្រឹកថ្ងៃព្រហស្បតិ៍ ប្រទេសស្រីលង្កាបានដាក់បម្រាមគោចរថ្មី ដែលនឹងអនុវត្តចាប់ពីម៉ោង ១២:០០ ថ្ងៃព្រហស្បតិ៍ដល់ម៉ោង ០៥:០០ ថ្ងៃសុក្រ៕

ប្រែសម្រួល៖ Vann Vann

ប្រភព៖ BBC

ចុចអាន៖ ប្រធានាធិបតីស្រីលង្កា ភៀសខ្លួនចេញពីប្រទេស