ព័ត៌មានអន្ដរជាតិ

ប៉ូលិសយាមលោក Abe ប្រាប់ថា មានអ្នករំខាន ទើបភ្នាត់ស្នៀតការពារមិនបាន

បានផុស

២ years មុន

នៅ

ថ្ងៃសុក្រ ១៥ កក្កដា ២០២២

ដោយ

ប៉ូលិសបាននិយាយថា មន្ត្រីម្នាក់ដែលយាមអតីតនាយករដ្ឋមន្ត្រីលោក Abe Shinzo ត្រូវបានរំខានដោយអ្នកដំណើរឆ្លងកាត់ ដូច្នេះមន្ត្រីរូបនោះមិនបានឃើញជនដៃដល់ឈ្មោះ Yamagami Tetsuya ចូលមកជិតលោក Abe ពីខាងក្រោយនោះទេ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមអ្នកស៊ើបអង្កេតបាននិយាយថា មន្ត្រីប៉ូលិស ៤ នាក់ រួមទាំងមន្ត្រីសន្តិសុខពិសេសម្នាក់ដែលត្រូវបានបញ្ជូនមកពីនាយកដ្ឋានប៉ូលិសក្រុងតូក្យូ បានឈរយាមក្បែរលោក Abe ហើយម្នាក់ក្នុងចំណោមពួកគេទទួលបន្ទុកសន្តិសុខនៅពីក្រោយអតីតនាយករដ្ឋមន្ត្រីរូបនេះ ។

ក្រុមអ្នកស៊ើបអង្កេតបញ្ជាក់ទៀតថា ភ្លាមៗមុនពេលមានការវាយប្រហារ មន្ត្រីនេះត្រូវបានរំខានដោយបុរសម្នាក់បានរុញរទេះឆ្លងកាត់ពីក្រោយលោក Abe ហើយអ្នកយាមមិនបានឃើញជនដៃដល់បានចូលទៅជិតលោក Abe ពីខាងក្រោយឡើយ ។ ចំណែកប៉ូលិសម្នាក់ទៀតដែលកំពុងយាមនៅចិញ្ចើមផ្លូវដែល Yamagami ឈរពីដំបូង ក៏មិនឃើញរូបគេដើរមកលើផ្លូវនោះទៀតដែរ ។

ទន្ទឹមនោះ ទីភ្នាក់ងារប៉ូលិសជាតិក៏កំពុងធ្វើការដើម្បីកំណត់ពីចំណុចខ្វះខាតណាមួយនៅក្នុងការរៀបចំសន្តិសុខរបស់លោក Abe រួមទាំងសន្តិសុខមិនគ្រប់គ្រាន់នៅពីក្រោយលោកផងដែរ ខណៈទីភ្នាក់ងារនេះគ្រោងនឹងកែសម្រួលវិធានការសន្តិសុខសម្រាប់ការពារឥស្សរជនជាន់ខ្ពស់ផ្សេងទៀតផងដែរ ។

គួរបញ្ជាក់ថា មួយសប្តាហ៍បានកន្លងផុតទៅ ចាប់តាំងពីលោក Abe ត្រូវបានបាញ់សម្លាប់ ។ ការបាញ់ប្រហារនេះបានកើតឡើង ខណៈពេលដែលលោកកំពុងថ្លែងសុន្ទរកថានៅទីក្រុង Nara ភាគខាងលិចប្រទេសជប៉ុនកាលពីថ្ងៃសុក្រ ហើយភ្លាមៗនោះជនដៃដល់ឈ្មោះ Yamagami អាយុ ៤១ ឆ្នាំ ត្រូវបានចាប់ខ្លួននៅនឹងកន្លែងតែម្ដង ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ ចម្លើយសារភាពថ្មី ៖ ជនដៃដល់គុំតាំងពីជំនាន់ជីតាលោក Abe មកម្ល៉េះ