បក្សភឿថៃ ស្នើលោក ប្រាយុទ្ធ ដោះស្រាយបញ្ហាតម្លៃអគ្គិសនីឡើងថ្លៃខ្ពស់ ពិសេសចរចាប្រភពថាមពលជាមួយ កម្ពុជា

នៅ​ថ្ងៃ​ទី​១៤ ខែ​កក្កដា លោក Phachara Naripthaphan ក្រុមប្រឹក្សាភិបាល និងក្រុមការងារសេដ្ឋកិច្ចរបស់គណបក្សភឿថៃ បាននិយាយអំពីការដំឡើងថ្លៃអគ្គិសនីពី ៤ បាតទៅ ៥ បាតក្នុង ១ គីឡូវ៉ាត់ម៉ោង សម្រាប់ខែកញ្ញាខាងមុខថា ការដំឡើងថ្លៃអគ្គិសនីលើសពី ២៥ ភាគរយគឺជាបន្ទុកដ៏ធ្ងន់សម្រាប់ប្រជាជនអ្នកប្រើប្រាស់ ។

បច្ចុប្បន្នអគ្គិសនីរបស់ប្រទេសថៃផលិតចេញពីឧស្ម័នធម្មជាតិច្រើនជាង ៦០ ភាគរយ ជាឧស្ម័ន​ធម្មជាតិ​ដែល​ថៃ​អាច​ជីក ​និងផលិត​បាន​ដោយ​ខ្លួន​ឯង នាំចូល ៣៥ ភាគរយ, នាំចូលពីប្រទេសមីយ៉ាន់ម៉ា ១៧ ភាគរយ នាំចូលហ្គាស LNG ១៨ ភាគរយ ។

លោក Phachara បន្តថា ទន្ទឹមនឹងនេះប្រទេសថៃផលិតឧស្ម័នធម្មជាតិនៅក្នុងឈូងសមុទ្រថៃបានតិច ដោយ​សារតែ​ជម្លោះ​រវាង​អ្នក​ដេញថ្លៃ​សម្បទាន​ថ្មីជាមួយនឹង​អ្នក​សម្បទាន​មុន ក្នុងការរុះរើឧបករណ៍ខួង ទើបមិនអាចនាំយក​ឧស្ម័ន​ធម្មជាតិទាំងនោះ​ឡើងមកប្រើបានដូចការរំពឹងទុក ។

លោកសង្កត់ធ្ងន់ថា ដូច្នេះ នាយករដ្ឋមន្ត្រីលោក ប្រាយុទ្ធ ចាន់អូចា គួរតែដោះស្រាយវិវាទនេះ និងពន្លឿនការចរចាអំពីប្រភពធនធានថាមពលនៅក្នុងតំបន់ត្រួតស៊ីគ្នារវាងថៃ និងកម្ពុជាដើម្បីនាំយកឧស្ម័នធម្មជាតិដែលមានតម្លៃថោក យកមកជំនួសឲ្យការនាំចូលហ្គាស LNG ព្រម​ទាំង​បញ្ឈប់​ការ​ផ្តល់​អាជ្ញាប័ណ្ណ​ផលិត​ថាមពល​ដល់​រោងចក្រ​អគ្គិសនី​ដែល​មិន​ផ្គត់ផ្គង់​អគ្គិសនី និងចរចាកាត់បន្ថយ​តម្លៃ​អគ្គិសនី​ឲ្យចុះថោក​ផង​ដែរ ៕

ប្រែសម្រួលដោយ ៖ គង់ សំអាន

ប្រភព ៖ Daily News

ចុចអាន ៖ កូនស្រីលោក ថាក់ស៊ីន ចូលរួមកាន់ទុក្ខលោក អាបេ តំណាងត្រកូល ស៊ីណាវ៉ាត់ត្រា