ប៉ូលិស ថៃ ឆ្មក់ចូលប្រភពលក់អាវុធតាមអនឡាញ ២ កន្លែង ដកហូតកាំភ្លើងជាង ២,៣០០ ដើម

ប៉ូលិសបង្ក្រាបឧក្រិដ្ឋកម្មតាមអ៊ីនធឺណិតថៃបានឆ្មក់ចូលឆែកឆេរ​ទីតាំងជួញដូរអាវុធខុសច្បាប់ចំនួន ២ កន្លែងដែលផ្សព្វផ្សាយលក់អាវុធតាមអនឡាញ ដោយរឹបអូសបានអាវុធជាង ២,៣០០ ដើម និងគ្រាប់រំសេវរាប់សែនគ្រាប់ ខណៈ​វត្ថុ​តាងមួយចំនួនទៀតក៏បញ្ជូនបានទៅ​កាន់​ផ្នែក​ជំនាញ និងពង្រីកការស៊ើបអង្កេតបន្តផងដែរ ។

លោក​ឧត្តម​សេនីយ៍ទោ Kornchai Klailueng អគ្គ​ស្នងការ​រង​នគរបាល​ជាតិ​ថៃទទួលបន្ទុកផ្នែកបច្ចេកវិទ្យា​អ៊ីនធឺណិតបានប្រាប់សន្និសិទកាសែតថា លទ្ធផលប្រតិបត្តិការឆែកឆេរប្រភពជួញដូរអាវុធខុសច្បាប់ចំនួន ២ កន្លែងតាមរយៈអនឡាញនេះ ប៉ូលិសបានរកឃើញទីតាំង​ទី ​១ គឺនៅហាងលក់ទំនិញមួយស្ថិតនៅផ្លូវរតនា​ក្រុងបាងកក ដោយរឹបអូស​បានវត្ថុតាងរួមមាន កាំភ្លើង ចំនួន ១,៨៦៥ ដើម និងគ្រាប់រំសេវចំនួន ៨២,៤៥០ គ្រាប់ ឧបករណ៍ទប់សម្លេងកាំភ្លើងចំនួន ៣១ ។

លោកឧត្តមសេនីយ៍ទោបញ្ជាក់ថា ចំណែកទីតាំងទី ២ គឺនៅភូមិសាស្ត្រម្តុំផ្លូវរ៉ាមខាំហេងក្រុងបាងកក ដោយរឹបអូសបានវត្ថុតាងរួមមាន កាំភ្លើងខ្យល់សម្ពាធខ្លាំងលេខ ១ និងលេខ ២ ចំនួន ១៤២ ដើម រួមជាមួយនឹងកាំភ្លើងខ្លីចំនួន ២៣៨ ដើម, គ្រាប់កាំភ្លើងខ្យល់លេខ ១ និងលេខ ២ សរុបចំនួន ៤១០ ប្រអប់ ៕

ប្រែសម្រួលដោយ ៖ គង់ សំអាន

ប្រភព ៖ Naewna

ចុចអាន ៖ បក្សភឿ ថៃ ស្នើលោក ប្រាយុទ្ធ ដោះស្រាយបញ្ហាតម្លៃអគ្គិសនីឡើងថ្លៃខ្ពស់ ពិសេសចរចាប្រភពថាមពលជាមួយ កម្ពុជា