អឺរ៉ុប “កំពុងបាញ់សួតខ្លួនឯង” ពីការដាក់ទណ្ឌកម្មលើ រុស្ស៊ី

នាយករដ្ឋមន្ត្រីហុងគ្រីលោក Viktor Orban បាននិយាយកាលពីថ្ងៃសុក្រថា សហភាពអឺរ៉ុបកំពុង “បាញ់សួតខ្លួនឯង” បន្ទាប់ពីពិចារណាដាក់ទណ្ឌកម្មសេដ្ឋកិច្ចថ្មីលើប្រទេសរុស្ស៊ី ពោលវានឹងបំផ្លាញសេដ្ឋកិច្ចអឺរ៉ុបតែម្ដង ។

លោក Orban បានប្រាប់វិទ្យុសាធារណៈនៅក្នុងបទសម្ភាសន៍មួយថា “ពីដំបូងខ្ញុំគិតថា យើងគ្រាន់តែបាញ់ជើងខ្លួនឯងប៉ុណ្ណោះ ប៉ុន្តែឥឡូវនេះវាច្បាស់ណាស់ថា សេដ្ឋកិច្ចអឺរ៉ុបគឺបាញ់សួតខ្លួនឯង” ។

លោក Orban បាននិយាយថា អ៊ុយក្រែនត្រូវការជំនួយ ប៉ុន្តែមេដឹកនាំអឺរ៉ុបគួរតែពិចារណាឡើងវិញនូវយុទ្ធសាស្ត្ររបស់ពួកគេ ព្រោះថា ទណ្ឌកម្មបានបង្កការខូចខាតយ៉ាងទូលំទូលាយដល់សេដ្ឋកិច្ចអឺរ៉ុប ហើយមិនទាន់ឃើញមានសញ្ញាណាមួយធ្វើឲ្យរុស្ស៊ីចុះខ្សោយ ឬមានដំណោះស្រាយបញ្ចប់សង្គ្រាមនៅឡើយទេ ។

លោកនាយករដ្ឋមន្ត្រីហុងគ្រីបានបញ្ជាក់ថា “ទណ្ឌកម្មមិនបានជួយអ៊ុយក្រែននោះទេ ប៉ុន្តែវាកាន់តែអាក្រក់ទៅសម្រាប់សេដ្ឋកិច្ចអឺរ៉ុប ហើយប្រសិនបើវាបន្តដូចនេះ ពួកគេនឹងសម្លាប់សេដ្ឋកិច្ចអឺរ៉ុប ហើយអ្វី​ដែល​យើង​ឃើញ​នៅ​ពេល​នេះ​គឺ អឺរ៉ុប​មិន​អាច​ទ្រាំ​ទ្រ​បាននោះទេ” ។

គួរបញ្ជាក់ថា ការផ្គត់ផ្គង់ហ្គាសទៅកាន់អឺរ៉ុបបានរឹតបន្តឹង ហើយតម្លៃប្រេងឥន្ធនៈបានកើនឡើង ចាប់តាំងពីសង្គ្រាមលុកលុយរបស់រុស្ស៊ីមកអ៊ុយក្រែនក្នុងខែកុម្ភៈ ខណៈការដាក់ទណ្ឌកម្មជាបន្តបន្ទាប់ក៏បណ្តាលឲ្យប្រទេសនានាកំពុងព្យាយាមបំពេញស្តុករបស់ខ្លួនឡើងវិញ និងបង្កើនបណ្តាញផ្គត់ផ្គង់ផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ Daily Sabah

ចុចអាន ៖ សង្គ្រាមនៅ អ៊ុយក្រែន នឹងចប់ឆាប់ៗ បើ អង់គ្លេស គិតថា គ្មានលទ្ធភាពឈ្នះ រុស្ស៊ី