ព័ត៌មានអន្ដរជាតិ

ប្រទេស ២ ទៀតចរចាចូលសមាជិកសហភាពអឺរ៉ុប ដោយសារឥទ្ធិពលរបស់ រុស្ស៊ី

បានផុស

៣ years មុន

នៅ

ថ្ងៃពុធ ២០ កក្កដា ២០២២

ដោយ

សហភាពអឺរ៉ុបកាលពីថ្ងៃអង្គារបានចាប់ផ្តើមការចរចាចូលជាសមាជិកជាមួយប្រទេសបាល់កង់ចំនួន ២ គឺប្រទេសអាល់បានី និងម៉ាសេដូនីខាងជើង បន្ទាប់ពីការកើនឡើងក្ដីបារម្ភនៅក្នុងប្រទេសទាំងនោះពាក់ព័ន្ធនឹងឥទ្ធិពលរបស់រុស្ស៊ីក្នុងសង្គ្រាមលើអ៊ុយក្រែន ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រធានគណៈកម្មការអឺរ៉ុបលោកស្រី Ursula von der Leyen បានពណ៌នាចំណាត់ការនេះថា ជាពេលវេលាប្រវត្តិសាស្ត្រ ខណៈលោកស្រីបាននិយាយទៅកាន់នាយករដ្ឋមន្ត្រីនៃប្រទេសទាំងពីរថា “អ្នក និងប្រជាជនរបស់អ្នកបានខិតខំយ៉ាងខ្លាំងដើម្បីមកទីនេះចូលរួមជាមួយសហភាពអឺរ៉ុប” ។

កន្លងមកប្រទេសម៉ាសេដូនីខាងជើងធ្លាប់បានដាក់ពាក្យសុំចូលជាសមាជិកសហភាពអឺរ៉ុបក្នុងឆ្នាំ ២០០៤ ខណៈអាល់បានីបានធ្វើដូចគ្នាក្នុងឆ្នាំ ២០០៩ ហើយសមាជិកសហភាពអឺរ៉ុបក៏បានយល់ព្រមដើម្បីចាប់ផ្តើមការចរចាជាមួយប្រទេសបាល់កង់ទាំងពីរនៅឆ្នាំ ២០២០ ។

ប៉ុន្តែប្រទេសទាំងពីរបានបរាជ័យក្នុងការចូលជាសមាជិកសហភាពអឺរ៉ុប បន្ទាប់ពីប្រទេសប៊ុលហ្គារីបានប្រឆាំងនឹងការចូលជាសមាជិករបស់ម៉ាសេដូនីខាងជើង ។ ការប្រឆាំងរបស់ប៊ុលហ្គារីគឺដោយសារការប្រព្រឹត្តរបស់ម៉ាសេដូនីខាងជើងលើជនជាតិភាគតិចប៊ុលហ្គារីក្នុងប្រទេស ។

ទីបំផុតភាគីទាំងពីរបានចាប់ផ្តើមការចរចា បន្ទាប់ពីម៉ាសេដូនីខាងជើងបានទទួលយកកិច្ចព្រមព្រៀងរបស់ក្រុមប្រឹក្សាភិបាលដែលមានគោលបំណងដោះស្រាយជម្លោះជាមួយប៊ុលហ្គារីក្នុងខែនេះ ។

ទោះយ៉ាងណាក្រុមអ្នកសង្កេតការណ៍បាននិយាយថា ប្រទេសទាំងពីរក៏ត្រូវតែខិតខំប្រឹងប្រែងដើម្បីបំពេញតាមស្តង់ដារនយោបាយ សេដ្ឋកិច្ច តុលាការ និងស្តង់ដារដ៏ទៃទៀតដែលទាមទារសម្រាប់សមាជិកភាពសហភាពអឺរ៉ុប ប៉ុន្តែវាក៏អាចចំណាយពេលច្រើនឆ្នាំផងដែរ ។

គួរបញ្ជក់ថា ការចាប់ផ្ដើមចរចាចូលជាសមាជិកសហភាពអឺរ៉ុបរបស់ប្រទេសទាំងពីរកើតឡើង បន្ទាប់ពីអ៊ុយក្រែន និងប្រទេសម៉ុលដាវីត្រូវបានផ្តល់ឋានៈជាបេក្ខជនសមាជិកភាពសហភាពអឺរ៉ុបក្នុងខែមិថុនា ក្រោយរុស្ស៊ីបានចូលលុកលុយទីក្រុងកៀវ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ អ៊ុយក្រែន នឹងផ្ដាច់ទំនាក់ទំនងជាមួយប្រទេសសម្ព័ន្ធមិត្ត រុស្ស៊ី ភ្លាម បើកងទ័ពហ៊ានចូលទឹកដីខ្លួន