អាមេរិក កំពុងភ័យថា ចិន អាចដាក់តំបន់គ្មានការហោះហើរលើ តៃវ៉ាន់

សារព័ត៌មាន CNN បានរាយការណ៍ថា សហរដ្ឋអាមេរិកកំពុងព្រួយបារម្ភពីចិនអាចប្រកាសតំបន់គ្មានការហោះហើរលើកោះតៃវ៉ាន់ ដើម្បីជាការឆ្លើយតបទៅនឹងដំណើរទស្សនកិច្ចដ៏មានសក្តានុពលរបស់ប្រធានសភាគឺលោកស្រី Nancy Pelosi ទៅកាន់កោះនេះ ។

ដោយដកស្រង់សម្ដីពីមន្ត្រីអាមេរិក, CNN បានរាយការណ៍ទៀតថា ប្រទេសចិនអាចដាក់តំបន់គ្មានការហោះហើរពីលើដែនអាកាសតៃវ៉ាន់ ឬហោះហើរយន្តហោះចម្បាំងចូលទៅក្នុងតំបន់ការពារដែនអាកាសរបស់តៃវ៉ាន់ ដើម្បីឆ្លើយតបទៅនឹងដំណើរទស្សនកិច្ចរបស់លោកស្រី Pelosi ។

ទន្ទឹមនោះមន្ត្រីខាងលើបាននិយាយថា សកម្មភាពបែបនេះអាចផ្តើមឲ្យមានការឆ្លើយតបពីតៃវ៉ាន់ ឬសហរដ្ឋអាមេរិក ស្របពេលដែលលោកស្រី Pelosi បាននឹងកំពុងរៀបចំផែនការធ្វើដំណើរទៅកាន់កោះតៃវ៉ាន់ក្នុងប៉ុន្មានសប្តាហ៍ខាងមុខនេះ ។

របាយការណ៍បានបន្ថែមថា លោកស្រី Pelosi នឹងក្លាយជាសមាជិកសភាជាន់ខ្ពស់បំផុតរបស់សហរដ្ឋអាមេរិកដែលធ្វើទស្សនកិច្ចនៅតៃវ៉ាន់ក្នុងរយៈពេល ២៥ ឆ្នាំ ចាប់តាំងពីដំណើររបស់អតីតប្រធានសភាលោក Newt Gingrich ទៅកាន់កោះនេះក្នុងឆ្នាំ ១៩៩៧ ។

ស្របពេលជាមួយគ្នានេះ អ្នកនាំពាក្យក្រសួងការបរទេសចិន លោក Wang Wenbin បាននិយាយកាលពីថ្ងៃព្រហស្បតិ៍ថា រដ្ឋាភិបាលក្រុងប៉េកាំងនឹងចាត់វិធានការយ៉ាងម៉ឺងម៉ាត់ ប្រសិនបើលោកស្រី Pelosi អនុវត្តតាមដំណើរទស្សនកិច្ចរបស់លោកស្រីទៅកាន់កោះតៃវ៉ាន់ ។

បន្ថែមពីនេះប្រទេសចិនក៏បានរិះគន់សហរដ្ឋអាមេរិកម្តងហើយម្តងទៀតចំពោះការរក្សាទំនាក់ទំនងផ្លូវការជាមួយតៃវ៉ាន់ ដោយនិយាយថា សកម្មភាពបែបនេះរំលោភលើអធិបតេយ្យភាព និងបូរណភាពទឹកដីរបស់ចិន និងបង្កអស្ថិរភាពនៅក្នុងតំបន់ផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ រុស្ស៊ី ប្រាប់ចំនួនកម្ទេចប្រព័ន្ធរ៉ុកកែត HIMARS របស់ អាមេរិក ផ្ដល់ឲ្យ អ៊ុយក្រែន