អាមេរិក ជំរុញ ចិន ឲ្យថ្កោលទោស មី​យ៉ាន់​ម៉ា ក្រោយប្រហារជីវិត​សកម្មជន​ (មានវីដេអូ)

សហរដ្ឋអាមេរិក ​បាន​ជំរុញ​ឲ្យប្រទេសចិន ​បង្កើន​សម្ពាធ​លើ​មី​យ៉ាន់​ម៉ា បន្ទាប់ពី​ ​យោធា​ ​ប្រហារជីវិត​សកម្មជន​ប្រជាធិបតេយ្យចំនួន ៤​នាក់​។

អ្នកនាំពាក្យក្រសួងការបរទេសអាមេរិក លោក Ned Price បាននិយាយថា ប្រទេសចិនអាចមានឥទ្ធិពលលើ មីយ៉ាន់ម៉ា ខ្លាំងជាងប្រទេសដទៃទៀត។

លោកនិយាយថា “យើងកំពុងអំពាវនាវឲ្យប្រទេសជុំវិញពិភពលោកធ្វើបន្ថែមទៀត។ យើងក៏នឹងធ្វើបន្ថែមទៀតផងដែរ”។

 

ទោះបីជាយ៉ាងណាក៏ដោយ អ្នកនាំពាក្យ​ក្រសួងការបរទេស​ចិន​បាន​និយាយថា ទីក្រុងប៉េកាំង ​មិន​លូកដៃ​ចូល​កិច្ចការ​ផ្ទៃក្នុង​របស់​ប្រទេស​ដទៃ​ឡើយ”​។

នៅពេលសួរអំពីការប្រហារជីវិត លោក Zhao Lijian បានបញ្ជាក់ថា មីយ៉ាន់ម៉ា គួរតែប្រើប្រាស់ច្បាប់ និងរដ្ឋធម្មនុញ្ញរបស់ខ្លួន ដើម្បីដោះស្រាយភាពខ្វែងគំនិតគ្នា។

សកម្មជនឈ្មោះ Kyaw Min Yu ដែលគេស្គាល់ច្បាស់ថា Ko Jimmy និងអតីតសមាជិកសភា Phyo Zeya Thaw គឺស្ថិតក្នុងចំណោមអ្នកដែលត្រូវប្រហារជីវិត។

សកម្មជនទាំង២នាក់នេះ ​ត្រូវ​បាន​ចាប់​ខ្លួន​បន្ទាប់​ពី​រដ្ឋ​ប្រហារ​ដឹកនាំ​ដោយ​កង​ទ័ព​កាល​ពី​ឆ្នាំ​មុន និងរងការចោទ​ប្រកាន់​ពី​បទ​ប្រព្រឹត្ត​អំពើ​ភេរវកម្ម។ ពួក​គេ​ត្រូវ​បាន​កាត់​ទោស​ប្រហារ​ជីវិត​នៅ​ក្នុង​សវនាការ​បិទ​ទ្វារ​ ដែល​ក្រុម​សិទ្ធិ​មនុស្ស​រិះគន់​ថា​ជា​រឿង​អយុត្តិធម៌។

រីឯសកម្មជនពីរនាក់ទៀតគឺ Hla Myo Aung និង Aung Thura Zaw មិនសូវល្បីឈ្មោះទេ។ ពួកគេ​ត្រូវ​បាន​កាត់ទោស​ប្រហារជីវិត​ពី​បទ​សម្លាប់​ស្ត្រី​ម្នាក់ ​ដែល​ជា​អ្នក​ផ្តល់​ព័ត៌មានឲ្យ​យោធា។

អង្គការលើកលែងទោសអន្តរជាតិ បានព្រមានថា មនុស្សប្រមាណ១០០នាក់ទៀតនៅក្នុងប្រទេសនេះ នឹងទទួលទោសប្រហារជីវិតបន្ទាប់ពីត្រូវបានកាត់ទោសក្នុងដំណើរការស្រដៀងគ្នានេះ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ BBC

ចុចអាន៖ មីយ៉ាន់ម៉ា ប្រហារជីវិតមនុស្សលើកដំបូង ក្នុងរយៈពេលជាង ៤ទសវត្សរ៍