ព័ត៌មានអន្ដរជាតិ

ហេតុអ្វីប្រធានសភាអាមេរិក ចង់ទៅតៃវ៉ាន់ ហើយហេតុអ្វីចិន ប្រឆាំងដំណើរទស្សនកិច្ចនេះ? (មានវីដេអូ)

បានផុស

៣ years មុន

នៅ

ថ្ងៃព្រហស្បតិ៍ ២៨ កក្កដា ២០២២

ដោយ

កាលពីថ្ងៃអង្គារទី២៦ខែកក្កដា ប្រទេសចិនបានព្រមានជាថ្មីម្តងទៀតថា អាចមានការឆ្លើយតបផ្នែកយោធា ប្រសិនបើប្រធានសភាអាមេរិក លោកស្រី Nancy Pelosi ទៅបំពេញទស្សនកិច្ចនៅកោះតៃវ៉ាន់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រសិនបើលោកស្រី Pelosi ធ្វើទស្សនកិច្ចនៅតៃវ៉ាន់មែន នោះនឹងបំពានយ៉ាងធ្ងន់ធ្ងរលើគោលការណ៍ចិនតែមួយ ហើយប៉ះពាល់យ៉ាងខ្លាំងដល់អធិបតេយ្យភាព និងបូរណភាពទឹកដីរបស់ប្រទេសចិន រួមទាំងធ្វើឲ្យខូចខាតយ៉ាងធ្ងន់ធ្ងរដល់មូលដ្ឋានគ្រឹះនយោបាយ នៃទំនាក់ទំនងចិន-អាមេរិកផងដែរ។ នេះបើតាមការបញ្ជាក់ពីលោកវរសេនីយ៍ឯក Tan Kefei អ្នកនាំពាក្យក្រសួងការពារជាតិចិន។

តើហេតុអ្វីបានជាលោកស្រី Pelosi ចង់ទៅកោះតៃវ៉ាន់?

មានការគាំទ្រយ៉ាងខ្លាំងចំពោះកោះតៃវ៉ាន់ ក្នុងចំណោមសាធារណជនអាមេរិក និងគណបក្សទាំង២ ក្នុងសភាអាមេរិក។ ហើយក្នុងអាជីពជាសមាជិកសភា រយៈពេល៣៥ឆ្នាំ, លោកស្រី Pelosi គឺជាអ្នករិះគន់ចិនខ្លាំងបំផុត។

លោកស្រី បានបរិហារកំណត់ត្រាសិទ្ធិមនុស្សរបស់ចិន, ជួបជាមួយក្រុមអ្នកគាំទ្រលទ្ធិប្រជាធិបតេយ្យ និងក៏បានទៅ ទីលាន Tiananmen ដើម្បីរំលឹកដល់ជនរងគ្រោះនៃការសម្លាប់រង្គាលឆ្នាំ១៩៨៩ផងដែរ។

លោកស្រី Pelosi បង្ហាញរូបសំណាករបស់ Tank Man យកមកពីទីលាន Tiananmen អំឡុងការជួបជុំជាមួយក្រុមអ្នកប្រឆាំងចិន នៅឆ្នាំ២០១៩

ដំបូងឡើយ លោកស្រី Pelosi គ្រោងនឹងទៅបំពេញទស្សនកិច្ចនៅកោះតៃវ៉ាន់ក្នុងខែមេសា ប៉ុន្តែបានលុបចោលដំណើរនោះវិញ បន្ទាប់ពីឆ្លងជំងឺកូវីដ១៩។ ឥឡូវ ប្រធានសភាអាមេរិករូបនេះ មានគម្រោងធ្វើដំណើរទៅតៃវ៉ាន់ក្នុងខែសីហា។

លោកស្រី Pelosi មិនបានបញ្ជាក់លម្អិតអំពីការធ្វើដំណើរនេះទេ ប៉ុន្តែលោកស្រីបានប្រាប់អ្នកសារព័ត៌មានកាលពីសប្តាហ៍មុនថា “វាមានសារសំខាន់ណាស់សម្រាប់យើង ក្នុងការបង្ហាញការគាំទ្រចំពោះតៃវ៉ាន់”។

តើហេតុអ្វីបានជាចិន ប្រឆាំងចំពោះដំណើរទស្សនកិច្ចនេះ?

ទីក្រុងប៉េកាំង ចាត់ទុកតៃវ៉ាន់ ជាទឹកដីរបស់ខ្លួន ហើយបានលើកឡើងម្តងហើយម្តងទៀត នូវទិដ្ឋភាពនៃកាត់យកទឹកដីនេះ ដោយប្រើកម្លាំងប្រសិនបើចាំបាច់។

មន្ត្រីចិនបានសម្តែងការខឹងសម្បា ចំពោះអ្វីដែលពួកគេចាត់ទុកថាជាការបង្កើនទំនាក់ទំនងការទូតរវាងក្រុងតៃប៉ិ និងក្រុងវ៉ាស៊ីនតោន។ នេះរួមបញ្ចូលទាំងដំណើរទស្សនកិច្ចដ៏គួរឲ្យភ្ញាក់ផ្អើលទៅកាន់កោះនេះ ដោយសមាជិកសភាអាមេរិកចំនួន ៦ រូបកាលពីខែមេសាផងដែរ។

កាលពីថ្ងៃចន្ទ អ្នកនាំពាក្យក្រសួងការបរទេសចិន លោក Zhao Lijian បានព្រមានថា ប្រទេសរបស់លោកនឹងចាត់វិធានការយ៉ាងម៉ឺងម៉ាត់ និងខ្លាំងក្លា ប្រសិនបើលោកស្រី Pelosi ធ្វើដំណើរទស្សនកិច្ចមែន ហើយសហរដ្ឋអាមេរិកនឹងទទួលខុសត្រូវចំពោះផលវិបាកធ្ងន់ធ្ងរទាំងអស់៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ BBC

ចុចអាន៖ ចិនព្រមានម្តងទៀត បើលោកស្រី Pelosi ធ្វើទស្សនកិច្ចតៃវ៉ាន់មែន ខ្លួនមិនអង្គុយស្ងៀមឡើយ អាចមានការឆ្លើយតបផ្នែកយោធា