អ៊ុយក្រែន សុំ អាមេរិក ផ្ដល់ឧស្ម័នដោយឥតគិតថ្លៃសម្រាប់រដូវរងា

នាយករដ្ឋមន្ត្រីអ៊ុយក្រែនលោក Denis Shmigal បាននិយាយថា ប្រទេសអ៊ុយក្រែននឹងស្នើសុំសហរដ្ឋអាមេរិកសម្រាប់ការផ្តល់ឧស្ម័នធម្មជាតិដោយឥតគិតថ្លៃមកឲ្យទីក្រុងកៀវសម្រាប់រដូវរងាដែលនឹងមកដល់នាពេលខាងមុខនេះ ។

លោកនាយករដ្ឋមន្ត្រីបាននិយាយថា “ការស្នើសុំនេះគឺធ្វើឡើងផ្អែកលើគោលការណ៍ដូចគ្នាដែលទីក្រុងវ៉ាស៊ីនតោនបានអនុវត្តកន្លងមកចំពោះការគាំទ្រផ្នែកអាវុធ និងគ្រាប់រំសេវដល់រដ្ឋាភិបាលទីក្រុងកៀវ ហើយវាក៏ជាតម្រូវការចាំបាច់របស់ប្រជាជាអ៊ុយក្រែនសម្រាប់រដូវរងាខាងមុខនេះ បន្ទាប់ពីសហភាព​អឺរ៉ុប​បាន​កំណត់​ការ​បែងចែក​ឧស្ម័ន” ។

ទន្ទឹមនោះលោក Shmigal បានបញ្ជាក់ក្នុងការបង្ហោះតាម Telegram ថា “រដ្ឋាភិបាលនៃប្រទេសអ៊ុយក្រែនបានសម្រេចចិត្តដាក់ពាក្យសុំទៅរដ្ឋាភិបាលនៃសហរដ្ឋអាមេរិកដើម្បីផ្តល់ឧស្ម័នឲ្យរដ្ឋរបស់យើងក្នុងរដូវរងាសម្រាប់កម្ដៅប្រជាជនរបស់យើង” ។

លោកបានបន្ថែមថា “ការរៀបចំសម្រាប់រដូវរងាដ៏លំបាកបំផុតក្នុងប្រវត្តិសាស្ត្ររបស់យើងនៅតែបន្ត ហើយយើងកំពុងស្វែងរកវិធីគ្រប់បែបយ៉ាងដែលអាចធ្វើបានដើម្បីត្រៀមខ្លួនសម្រាប់សេណារីយ៉ូណាទាំងអស់” ។

គួរបញ្ជាក់ថា សំណើរបស់លោក Shmigal កើតឡើង នៅពេលដែលក្រុមហ៊ុនឧស្ម័នរដ្ឋអ៊ុយក្រែន Naftogaz បានខកខានលើមូលបត្របំណុលរបស់ខ្លួន ហើយបានស្នើសុំពីរដ្ឋាភិបាលក្នុងទីក្រុងកៀវឲ្យជួយទទួលខុសត្រូវទាំងស្រុងចំពោះការរៃអង្គាសថវិកាដើម្បីនាំចូលឧស្ម័នធម្មជាតិសម្រាប់រដូវកម្ដៅនាពេលខាងមុខនេះ ៕

ប្រែសម្រួលដោយ ៖ ជីវ័ន្ត

ប្រភព ៖ RT

ចុចអាន ៖ អ៊ុយក្រែន ចង់ខ្ចីលុយធនាគារ ១៥ ទៅ ២០ ពាន់លានដុល្លារបន្ថែមទៀត