លោក Zelensky ៖ កប៉ាល់ដឹកគ្រាប់ធញ្ញជាតិត្រៀមចេញដំណើរការដើម្បីដោះស្រាយវិបត្តិស្បៀងអាហារពិភពលោក

ប្រធានាធិបតីអ៊ុយក្រែនលោក Volodymyr Zelensky បាននិយាយកាលពីថ្ងៃសុក្រថា កប៉ាល់ទីមួយកំពុងផ្ទុកគ្រាប់ធញ្ញជាតិនៅឯកំពង់ផែ Chornomorsk ចាប់តាំងពីរុស្ស៊ីបានចាប់ផ្តើមសង្រ្គាមលុកលុយលើអ៊ុយក្រែនកាលពីថ្ងៃទី ២៤ ខែកុម្ភៈ ។

លោក Zelensky បានគូសបញ្ជាក់ថា “នាវានេះនឹងនាំមកនូវក្តីសង្ឃឹមដល់ការដោះស្រាយវិបត្តិស្បៀងអាហារពិភពលោក មិនមែនត្រឹមតែគ្រាប់ធញ្ញជាតិនោះទេ ហើយវាក៏ជាការការពារការខ្វះខាតស្បៀងអាហារ ក៏ដូចជាភាពអត់ឃ្លាន និងចលាចលនយោបាយនៅក្នុងប្រទេសដែលត្រូវការផលិតផលម្ហូបអាហារ” ។

លោក Zelenskyy បាននិយាយថា “នាវាទីមួយនេះគឺជានាវាប្រទេសតួកគេ ហើយវាក៏ជាការបង្ហាញផងដែរថា កំពង់ផែបានចាប់ផ្តើមដំណើរការឡើងវិញហើយ ។ ប៉ុន្តែការ​នាំ​ចេញ​គ្រាប់​ធញ្ញជាតិនាពេលនេះ​ក៏មិនអាចបន្តចេញដំណើរបានដែរ ប្រសិនបើសង្រ្គាមនៅតែអូសបន្លាយទៀត” ។

ជាចុងក្រោយលោក Zelensky បញ្ជាក់ថា “ភាគីរបស់យើងបានរៀបចំដំណើរការនេះយ៉ាងពេញលេញ ហើយយើងបានបញ្ជូនសញ្ញាទាំងអស់ទៅកាន់ដៃគូរបស់យើងរួចហើយដូចជា អង្គការសហប្រជាជាតិ និងប្រទេសតួកគី ហើយយោធារបស់យើងនឹងធានានូវស្ថានភាពសន្តិសុខចំពោះការដឹកជញ្ជូននេះ” ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ អាមេរិក កំពុងទិញប្រព័ន្ធការពារមីស៊ីលឲ្យ អ៊ុយក្រែន