រុស្ស៊ី ហៅកាកបាទក្រហម និង UN ទៅស៊ើបអង្កេតករណីស្លាប់នៅក្នុងគុក អ៊ុយក្រែន

នៅថ្ងៃអាទិត្យ ទី៣១ ខែកក្កដានេះ រុស្ស៊ីបានអញ្ជើញអ្នកជំនាញអង្គការសហប្រជាជាតិ និងកាកបាទក្រហមឱ្យស៊ើបអង្កេតការស្លាប់របស់អ្នកទោសអ៊ុយក្រែនរាប់សិបនាក់ដែលត្រូវបានឃុំខ្លួន ដែលពួកគេសុទ្ធតែជាអ្នកចុះចូលជាមួយទីក្រុងមូស្គូ ខណៈប្រធានាធិបតីអ៊ុយក្រែនបានបញ្ជាឱ្យជម្លៀសអ្នកស្រុកនៅតំបន់ភាគខាងកើតនៃទីក្រុង Donetsk ។

ប្រធានាធិបតី Volodymyr Zelenskyy ថ្លែងនៅក្នុងសុន្ទរកថាតាមទូរទស្សន៍ថា មនុស្សរាប់សែននាក់នៅតែប្រឈមមុខនឹងការប្រយុទ្ធគ្នាយ៉ាងខ្លាំងក្លានៅក្នុងតំបន់ Donetsk និង Luhansk ទើបលោកសម្រេចនាំមនុស្សចាកចេញពីទីនេះ។

ស្របពេលដែលអ៊ុយក្រែន និងរុស្ស៊ីបានចោទប្រកាន់គ្នាទៅវិញទៅមកជុំវិញការវាយប្រហារដោយមីស៊ីល កាលពីថ្ងៃសុក្រ យោធារាប់សិបនាក់ត្រូវបានសម្លាប់ នៅក្នុងទីក្រុងជួរមុខ Olenivka ភាគខាងកើតតំបន់ Donetsk ។

ក្នុងនោះដែរ ក្រសួងការពារជាតិរុស្ស៊ីបានចេញផ្សាយបញ្ជីឈ្មោះអ្នកទោសសង្គ្រាមអ៊ុយក្រែន ៥០នាក់ត្រូវបានសម្លាប់ និង ៧៣នាក់រងរបួស ហើយថានេះជាការវាយប្រហាររបស់យោធាអ៊ុយក្រែនជាមួយនឹងប្រព័ន្ធរ៉ុក្កែតចល័តខ្ពស់ (HIMARS) ដែលផលិតដោយសហរដ្ឋអាមេរិក។

ចំណែកកងកម្លាំងប្រដាប់អាវុធរបស់អ៊ុយក្រែនបានបដិសេធមិនទទួលខុសត្រូវ ដោយនិយាយថា កាំភ្លើងធំរុស្ស៊ីជាអ្នកវាយប្រហារពន្ធនាគារខាងលើ។

ពាក់ព័ន្ធករណីនេះ អ្នកកាសែត Reuters ក៏បានបញ្ជាក់ពីការស្លាប់មួយចំនួននៅពន្ធនាគារផងដែរ ពិតជាមានយោធាស្លាប់ជាច្រើននាក់ពិតមែន។

ដោយឡែក អង្គការសហប្រជាជាតិបានរៀបចំបញ្ជូនអ្នកជំនាញទៅស៊ើបអង្កេត ប្រសិនបើខ្លួនទទួលបានការយល់ព្រមពីភាគីរុស្ស៊ី និងអ៊ុយក្រែន។ រីឯគណៈកម្មាធិការអន្តរជាតិនៃអង្គការកាកបាទក្រហមមិនបានឆ្លើយតបទៅនឹងការអញ្ជើញនេះទេ ប៉ុន្តែខ្លួនកំពុងស្វែងជំនួយនានា ដើម្បីជួយជម្លៀសអ្នករបួស៕

ប្រែសម្រួល៖ សន្យា

ប្រភព៖ CNA

ចុចអាន៖ ទីក្រុងញូវយ៉កប្រកាសអាសន្នជំងឺអុតស្វា ស្របពេលករណីឆ្លងកើនជាង ១ពាន់នាក់