លោកស្រី Pelosi ចាប់ផ្តើមដំណើរទស្សនកិច្ច នៅអាស៊ី ហើយ

ប្រធានសភាតំណាងរាស្រ្តអាមេរិក លោកស្រី Nancy Pelosi បានចាប់ផ្តើមដំណើរទស្សនកិច្ចទៅកាន់ប្រទេសអាស៊ីចំនួន ៤ កាលពីថ្ងៃអាទិត្យទី៣១ខែកក្កដា។ នេះបើតាមការបញ្ជាក់ពីការិយាល័យរបស់លោកស្រី ប៉ុន្តែមិននិយាយអំពីកោះតៃវ៉ាន់ទេ ចំពេលមានការរំពឹងទុកថាលោកស្រីអាចទៅបំពេញទស្សនកិច្ច កោះដែលគ្រប់គ្រងដោយខ្លួនឯងមួយនេះ។

ការិយាល័យរបស់លោកស្រីបាននិយាយនៅក្នុងសេចក្តីប្រកាសព័ត៌មានកាលពីថ្ងៃអាទិត្យថា “លោកស្រី Nancy Pelosi កំពុងដឹកនាំគណៈប្រតិភូសភា ទៅកាន់តំបន់ឥណ្ឌូប៉ាស៊ីហ្វិក រួមទាំងដំណើរទស្សនកិច្ចទៅកាន់ប្រទេសសិង្ហបុរី ម៉ាឡេស៊ី កូរ៉េខាងត្បូង និងជប៉ុន”។

យោងតាមសេចក្តីថ្លែងការណ៍, ដំណើរនេះនឹងរួមបញ្ចូលប្រទេសទាំងនោះ ប៉ុន្តែមិនបានបញ្ជាក់ថាតើលោកស្រី Pelosi អាចនឹងឈប់សំចតនៅកន្លែងផ្សេងទៀត ដែរឬក៏អត់នោះទេ។

សេចក្តីថ្លែងការណ៍ដដែលនិយាយថា “ដំណើរនេះ នឹងផ្តោតសំខាន់លើបញ្ហាសន្តិសុខទៅវិញទៅមក ភាពជាដៃគូសេដ្ឋកិច្ច និងអភិបាលកិច្ចតាមបែបប្រជាធិបតេយ្យនៅក្នុងតំបន់ឥណ្ឌូប៉ាស៊ីហ្វិក”។

ប្រទេសចិន បានចាត់ទុកដំណើរទស្សនកិច្ចរបស់មន្ត្រីអាមេរិកទៅកាន់កោះតៃវ៉ាន់ ថាជាការបញ្ជូនសញ្ញាលើកទឹកចិត្តដល់ជំរំគាំទ្រឯករាជ្យនៅលើកោះនេះ។

ទីក្រុងវ៉ាស៊ីនតោនមិនមានទំនាក់ទំនងការទូតជាផ្លូវការជាមួយតៃវ៉ាន់ទេ ប៉ុន្តែត្រូវបានចងភ្ជាប់ដោយច្បាប់ ក្នុងការផ្តល់ឲ្យកោះនេះនូវមធ្យោបាយដើម្បីការពារខ្លួន។

ដំណើរ​ទស្សនកិច្ច​របស់​លោកស្រី Pelosi នឹង​ក្លាយ​ជា​ការ​បង្ហាញ​ពី​ការ​គាំទ្រយ៉ាងខ្លាំង​របស់​សហរដ្ឋ​អាមេរិក​ចំពោះ​តៃវ៉ាន់​។ លោក Newt Gingrich មកពីគណបក្សសាធារណរដ្ឋ គឺជាប្រធានសភាអាមេរិក ចុងក្រោយបង្អស់ដែលបានទៅទស្សនកិច្ចតៃវ៉ាន់ក្នុងឆ្នាំ ១៩៩៧៕

ប្រែសម្រួល៖ Vann Vann

ប្រភព៖ Al Jazeera

ចុចអាន៖ ចិន គំរាមបាញ់ទម្លាក់យន្តហោះ ដឹកប្រធានសភា អាមេរិក