លោកស្រី Pelosi នឹងមក តៃវ៉ាន់ ទោះមានការគំរាមយ៉ាងណាក៏ដោយ

ប្រព័ន្ធផ្សព្វផ្សាយរបស់តៃវ៉ាន់បានរាយការណ៍ថា ប្រធានសភាអាមេរិកលោកស្រី Nancy Pelosi នឹងមកដល់ទីក្រុងតៃប៉ិនៅថ្ងៃអង្គារនេះ បន្ទាប់ពីបានបំពេញទស្សនកិច្ចនៅប្រទេសម៉ាឡេស៊ីរួចហើយ ។

សារព័ត៌មាន Taiwan News បានចុះផ្សាយថា លោកស្រី Pelosi ក៏នឹងជួបជាមួយប្រធានាធិបតីតៃវ៉ាន់លោកស្រី Tsai Ing-wen នៅថ្ងៃពុធ ប៉ុន្តែចំពោះពេលវេលាច្បាស់លាស់សម្រាប់ការចុះចតរបស់លោកស្រី Pelosi មិនទាន់ត្រូវបានកំណត់តាមការគ្រោងទុកនៅឡើយទេ ដោយសារតែមានការប្រឆាំងយ៉ាងខ្លាំងពីសំណាក់ប្រទេសចិន ។

ប្រធានសភាអាមេរិករូបនេះបានចាប់ផ្តើមដំណើរទស្សនកិច្ចនៅអាស៊ីទៅកាន់ប្រទេសសិង្ហបុរី ម៉ាឡេស៊ី កូរ៉េខាងត្បូង និងជប៉ុន ខណៈកន្លងមកប្រព័ន្ធផ្សព្វផ្សាយបានរាយការណ៍ថា ការធ្វើដំណើររបស់លោកស្រី Pelosi ក៏អាចរួមបញ្ចូលទាំងកោះតៃវ៉ាន់ផងដែរ ដែលជាដើមចមធ្វើឲ្យទីក្រុងប៉េកាំងបញ្ចេញប្រតិកម្មយ៉ាងខ្លាំង ដោយនិយាយថា វាអាចគំរាមកំហែងដល់សន្តិភាព និងស្ថិរភាពនៅច្រកសមុទ្រតៃវ៉ាន់ ។

ទន្ទឹមនោះអ្នកនាំពាក្យក្រសួងការបរទេសចិនលោក Zhao Lijian បាននិយាយថា “វានឹងជាការជ្រៀតជ្រែកទាំងស្រុងនៅក្នុងកិច្ចការផ្ទៃក្នុងរបស់ប្រទេសចិន និងធ្វើឲ្យខូចទំនាក់ទំនងចិន-អាមេរិកយ៉ាងធ្ងន់ធ្ងរផងដែរ” ។

លោក Zhao បានបន្ថែមថា “ប្រសិនបើប្រធានសភាអាមេរិកលោកស្រី Pelosi នៅតែទទូចចង់ធ្វើទស្សនកិច្ចនៅតៃវ៉ាន់មែននោះ ប្រទេសចិននឹងចាត់វិធានការយ៉ាងម៉ឺងម៉ាត់ និងរឹងមាំដើម្បីការពារអធិបតេយ្យភាព និងបូរណភាពទឹកដីរបស់ខ្លួន ហើយកងទ័ពរំដោះប្រជាជនចិននឹងមិនអង្គុយស្ងៀមឡើយ” ។

គួរបញ្ជាក់ថា លោកស្រី Nancy Pelosi បានធ្វើទស្សនកិច្ចនៅប្រទេសសិង្ហបុរីកាលពីថ្ងៃចន្ទ ហើយលោកស្រីបានជួបជាមួយនាយករដ្ឋមន្ត្រីលោក Lee Hsien Loong និងប្រធានាធិបតី Halimah Yacob ។ ក្នុង​ជំនួប​នោះ លោក Lee បាន​គូសបញ្ជាក់​ពី​សារៈសំខាន់​នៃ​ទំនាក់ទំនង​រវាង​អាមេរិក និង​ចិន​ដែលមាន​ស្ថិរភាព​សម្រាប់​សន្តិភាព និង​សន្តិសុខ​ក្នុង​តំបន់ ៕

ប្រែសម្រួលដោយ ៖ NHK / Taiwan News

ចុចអាន ៖ អាមេរិកព្រមានថា ចិន អាចបាញ់មីស៊ីល ជិតកោះតៃវ៉ាន់ ឬធ្វើសកម្មភាពយោធាទ្រង់ទ្រាយធំ បើលោកស្រី Pelosi បំពេញទស្សនកិច្ច