ឥណ្ឌូណេស៊ី ព្រមានកិច្ចព្រមព្រៀងនាវាមុជទឹកនុយក្លេអ៊ែរ អូស្ត្រាលី

ឥណ្ឌូណេស៊ីកំពុងចោទប្រកាន់អូស្ត្រាលីពីបទរំលោភលើសន្ធិសញ្ញាមិនរីកសាយភាយអាវុធនុយក្លេអ៊ែររបស់អង្គការសហប្រជាជាតិ (UN) ជុំវិញការប៉ុនប៉ងដើម្បីទទួលបាននាវាមុជទឹកនុយក្លេអ៊ែរជាផ្នែកនៃកិច្ចព្រមព្រៀង AUKUS ។

ឥណ្ឌូណេស៊ី​បាន​ព្រមាន​ថា បច្ចេកវិទ្យារបស់អូស្ត្រាលី​អាច​ត្រូវ​បាន​បំប្លែង​ទៅ​ជា​កម្មវិធី​សព្វាវុធ និង​កំពុង​បញ្ចុះបញ្ចូល​ប្រទេស​ចំនួន ១២០ ផ្សេងទៀត​ឲ្យ​គាំទ្រ​គោលជំហរ​របស់ខ្លួន ។

ទីក្រុងហ្សាកាតាបានសម្តែងការមិនសប្បាយចិត្តម្តងហើយម្តងទៀតអំពីការជំរុញនាវាមុជទឹកនុយក្លេអ៊ែររបស់ប្រទេសអូស្ត្រាលី ក៏ដូចជាការផ្ទេរសម្ភារៈនានាដែលធ្វើឡើងដោយគូប្រជែងនៃមហិច្ឆតានាវាមុជទឹកនុយក្លេអ៊ែររបស់អូស្ត្រាលី ។

ទន្ទឹមនោះ ប្រទេសឥណ្ឌូណេស៊ីបានចាត់ទុកកិច្ចសហប្រតិបត្តិការដែលពាក់ព័ន្ធនឹងការផ្ទេរសម្ភារៈនុយក្លេអ៊ែរ និងបច្ចេកវិទ្យាសម្រាប់គោលបំណងយោធាពីរដ្ឋអាវុធនុយក្លេអ៊ែរទៅរដ្ឋគ្មានអាវុធនុយក្លេអ៊ែរណាមួយ ជាការបង្កើនហានិភ័យដែលពាក់ព័ន្ធទៅនឹងមហន្តរាយមនុស្សធម៌ និងផលវិបាកបរិស្ថាន ។

បើទោះជា ការផ្ទេរសារធាតុអ៊ុយរ៉ាញ៉ូមដែលចម្រាញ់រួចសម្រាប់នាវាមុជទឹកដើរដោយថាមពលនុយក្លេអ៊ែរត្រូវបានអនុញ្ញាតនៅក្រោមសន្ធិសញ្ញាមិនរីកសាយភាយនុយក្លេអ៊ែរក៏ដោយ ប៉ុន្តែអូស្ត្រាលីបាននិយាយម្តងហើយម្តងទៀតថាខ្លួននៅតែមិនមានចេតនាក្នុងការអភិវឌ្ឍន៍អាវុធនុយក្លេអ៊ែរនេះនោះទេ ៕

ប្រែសម្រួលដោយ ៖ ជីវ័ន្ត

ប្រភព ៖ Sky News