លោក Zelensky ចង់ជួបពិភាក្សាផ្ទាល់ជាមួយប្រធានាធិបតីចិន Xi Jinping

ប្រធានាធិបតីអ៊ុយក្រែន Volodymyr Zelensky បាននិយាយថា លោកចង់ជួបពិភាក្សាជាមួយប្រធានាធិបតីចិន Xi Jinping ស្តីពីជម្លោះដែលកំពុងបន្តអូសបន្លាយពេលនៅអ៊ុយក្រែន ។

លោក Zelensky បានប្រាប់កាសែត South China Morning Post ថា “ខ្ញុំចង់និយាយដោយផ្ទាល់ជាមួយលោក Xi ព្រោះខ្ញុំធ្លាប់បានសន្ទនាជាមួយប្រធានាធិបតីចិនម្ដងរួចមកហើយកាលពីមួយឆ្នាំមុន” ។

លោកប្រធានាធិបតីបញ្ជាក់ថា “ចាប់តាំងពីការលុកលុយទ្រង់ទ្រាយធំផ្ទុះឡើងកាលពីខែកុម្ភៈមក យើងបានស្នើមន្ត្រីនានដើម្បីសន្ទនា ប៉ុន្តែយើងមិនបានទទួលការពិភាក្សាណាមួយពីភាគីចិននោះទេ ប៉ុន្តែសម្រាប់ពេលនេះ ខ្ញុំជឿថា យើងមានសង្ឃឹមខ្ពស់ ចិននឹងទទួលយកសំណើនេះ” ។

ប្រទេសរុស្ស៊ីបានចាប់ផ្តើមប្រតិបត្តិការយោធាពិសេសរបស់ខ្លួននៅក្នុងប្រទេសអ៊ុយក្រែនកាលពីថ្ងៃទី ២៤ ខែកុម្ភៈ ខណៈប្រទេសលោកខាងលិចជាច្រើន និងសម្ព័ន្ធមិត្តរបស់ពួកគេមួយចំនួនបានថ្កោលទោសទង្វើនេះ ដោយហៅវាថាជាសង្គ្រាមលុកលុយ ហើយបានដាក់ទណ្ឌកម្មជាបន្តបន្ទាប់លើប្រទេសរុស្ស៊ីផងដែរ ។

ប៉ុន្តែក្នុងពេលជាមួយគ្នានេះ ចិនក៏ដូចប្រទេសអាស៊ី អាហ្រ្វិក និងអាមេរិកឡាទីនជាច្រើនទៀតបានបដិសេធមិនចូលរួមក្នុងការដាក់ទណ្ឌកម្មនេះឡើយ ។ ជាងនេះទៅទៀត រុស្ស៊ីបានបង្កើនការនាំចេញប្រេងរបស់ខ្លួនទៅកាន់ប្រទេសចិនយ៉ាងខ្លាំង ចាប់តាំងពីសង្គ្រាមលុកលុយនោះមក ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ ចិន បិទនាំចេញ-នាំចូលទំនិញ តៃវ៉ាន់ ២ ពាន់មុខបន្ថែមទៀត