ចិន បញ្ចប់សមយុទ្ធយោធារយៈពេល ៤ ថ្ងៃ រកការសម្រេចចិត្តបង្រួបបង្រួម ជាមួយ តៃវ៉ាន់

ប្រទេសចិនបានបញ្ចប់ការធ្វើសមយុទ្ធយោធារយៈពេល ៤ ថ្ងៃជុំវិញកោះតៃវ៉ាន់ ហើយកំពុងពិនិត្យមើលសមិទ្ធផលនេះ ប្រសិនបើទីក្រុងប៉េកាំងសម្រេចចិត្តពេលណាមួយក្នុងការបង្រួបបង្រួមជាមួយតៃវ៉ាន់ដោយកម្លាំងយោធា ។

យោធាចិនបានធ្វើសមយុទ្ធទ្រង់ទ្រាយធំនៅក្នុងតំបន់ដែនសមុទ្រចំនួន ៦ និងដែនអាកាសដែលឡោមព័ទ្ធកោះតៃវ៉ាន់ ចាប់ពីថ្ងៃព្រហស្បតិ៍ដល់ថ្ងៃអាទិត្យ ។ ទង្វើ​នេះ​គឺ​ជា​ការ​ឆ្លើយ​តប​ទៅ​នឹង​ដំណើរ​ទស្សនកិច្ច​របស់​ប្រធាន​សភា​អាមេរិកលោកស្រី Nancy Pelosi នៅ​តៃវ៉ាន់កាលពីថ្ងៃអង្គារសប្ដាហ៍មុន ។

បញ្ជាការដ្ឋានយោធាដែលទទួលបន្ទុកនៅសមុទ្រចិនខាងកើតក៏បានបញ្ចេញវីដេអូបង្ហាញពីយន្តហោះចម្បាំង  និងយន្តហោះទម្លាក់គ្រាប់បែកក្នុងសមយុទ្ធប្រយុទ្ធកាលពីថ្ងៃអាទិត្យដែលផ្តោតលើការវាយប្រហារដូចពិតៗនៅលើដីគោក និងការធ្វើតេស្តសមត្ថភាពវាយប្រហាររយៈចម្ងាយឆ្ងាយនៅលើអាកាសជាដើម ។

ដោយឡែកលោក Meng Xiangqing សាស្ត្រាចារ្យនៅសាកលវិទ្យាល័យការពារជាតិបានប្រាប់ទូរទស្សន៍រដ្ឋចិនថា សមយុទ្ធនេះត្រូវបានធ្វើឡើងទាំងនៅរយៈចម្ងាយជិត និងឆ្ងាយមិនធ្លាប់មានពីមុនមកជុំវិញកោះតៃវ៉ាន់ ។

លោកបាននិយាយថា សមយុទ្ធយោធានេះក៏បានបញ្ជាក់ពីសមត្ថភាពរបស់ចិនក្នុងការឡោមព័ទ្ធតៃវ៉ាន់ និងរារាំងកងកម្លាំងបរទេសមិនឲ្យចូលក្នុងតំបន់នោះផងដែរ ។

ជាចុងក្រោយលោក Meng បញ្ជាក់ថា សមយុទ្ធ​នេះ​បាន​បង្កើត​លក្ខខណ្ឌ​ល្អ និង​អត្ថប្រយោជន៍​ជា​យុទ្ធសាស្ត្រ​សម្រាប់​ការ​បង្រួបបង្រួម​របស់​ចិន​ជាមួយ​តៃវ៉ាន់ បន្ទាប់ពីយន្តហោះ និង​នាវា​មួយចំនួន​ក្នុង​សមយុទ្ធ​បាន​ឆ្លង​កាត់​ខ្សែបន្ទាត់​មធ្យម ដែល​ជា​ការរារាំង​មិន​ផ្លូវការ​ដើម្បី​ជួយ​ការពារ​ការប៉ះទង្គិច​ដោយ​ចៃដន្យ​រវាង​កងកម្លាំង​ចិន និង​តៃវ៉ាន់ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ លោក Wang Yi ថ្លែងពី កម្ពុជា ថា អាមេរិក មិនគោរពគោលនយោបាយ ចិន តែមួយទេ