អ៊ីស្រាអែល និងប៉ាឡេស្ទីន ឈានដល់កិច្ចព្រមព្រៀងឈប់បាញ់គ្នា

បទឈប់បាញ់រវាងអ៊ីស្រាអែល និងក្រុមសកម្មប្រយុទ្ធប៉ាឡេស្ទីន បានចូលជាធរមានហើយ បន្ទាប់ពីអំពើហិង្សារយៈពេលបីថ្ងៃ ដែលបានបណ្តាលឲ្យមនុស្សយ៉ាងតិច ៤៣នាក់ស្លាប់។

ក្រុមសកម្មប្រយុទ្ធជីហាដឥស្លាមប៉ាឡេស្ទីន (PIJ) បាននិយាយថា បទឈប់បាញ់នឹងចាប់ផ្តើមនៅម៉ោង ២៣:៣០ (ម៉ោងក្នុងស្រុក) បន្ទាប់ពីកិច្ចពិភាក្សាដោយអ្នកសម្របសម្រួលអេហ្ស៊ីប។

ការិយាល័យនាយករដ្ឋមន្ត្រីអ៊ីស្រាអែល លោក Yair Lapid ក៏បានបញ្ជាក់ពីបទឈប់បាញ់នេះដែរ។

ការវាយប្រហារចុងក្រោយបំផុតនេះ គឺជាអំពើហិង្សាធ្ងន់ធ្ងរបំផុតរវាងអ៊ីស្រាអែល និងហ្គាហ្សា ចាប់តាំងពីជម្លោះរយៈពេល ១១ ថ្ងៃក្នុងខែឧសភា ឆ្នាំ ២០២១។

យោធា​អ៊ីស្រាអែល​និយាយ​ថា ខ្លួន​បាន​ចាប់​ផ្តើម​ការ​វាយ​ប្រហារ​ចុង​ក្រោយ​បំផុត ​លើ​ទីតាំង​នានា​ក្នុង​ជ្រោយហ្គាហ្សា ដើម្បីឆ្លើយ​តបទៅ​នឹង​ការ​គំរាម​កំហែង​ពី​ក្រុម​សកម្មប្រយុទ្ធ ហើយវាបានកើតឡើង ក្រោយមានភាពតានតឹងរយៈពេលជាច្រើនថ្ងៃ បន្ទាប់ពីអ៊ីស្រាអែល ចាប់ខ្លួនសមាជិកជាន់ខ្ពស់របស់ PIJ នៅតំបន់ West Bank។

គិតត្រឹមល្ងាចថ្ងៃអាទិត្យទី០៧ខែសីហា ក្រសួងសុខាភិបាលប៉ាឡេស្ទីនបាននិយាយថា កុមារចំនួន ១៥ នាក់ត្រូវបានបញ្ជាក់ក្នុងចំណោមអ្នកស្លាប់ចំនួន ៤៣ នាក់នៅក្នុងអំពើហិង្សាចុងក្រោយបង្អស់ខណៈជាង ៣០០នាក់ រងរបួស៕

ប្រែសម្រួល៖ Vann Vann

ប្រភព៖ BBC

ចុចអាន៖ ស្លាប់កើនដល់២៩នាក់ និងរបួស ២៥៣នាក់ ក្រោយការវាយប្រហាររបស់អ៊ីស្រាអែល នៅ ហ្គាហ្សា