ទំនាយរបស់លោកយាយពិការភ្នែក​ Baba Vanga សម្រាប់ឆ្នាំ២០២១ ពិតជារន្ធត់

មនុស្សភាគច្រើនប្រហែលជាបានស្គាល់លោកយាយពិការភ្នែក Baba Vanga ហើយ។ សមត្ថភាពទស្សន៍ទាយរបស់គាត់ត្រូវបានមនុស្សលើសកលលោកកោតសរសើរពោលគឺលោកយាយបានទាយត្រូវហេតុការណ៍ធំៗជាច្រើនដូចជាការរំលាយសហភាពសូវៀត, ការវាយប្រហារថ្ងៃទី១១ខែកញ្ញាឆ្នាំ២០០១, ការសោយទិវង្គតរបស់ព្រះនាង Diana និងគ្រោះមហន្តរាយ Chernobyl ជាដើមពោលគឺអត្រាត្រឹមត្រូវរបស់គាត់គឺមានរហូតដល់ទៅ៨៥ភាគរយឯណោះ។

លោកយាយ Baba Vanga ដែលមានឈ្មោះពិត Vangelia Gushterova បានពិការភ្នែកនៅអាយុ១២ឆ្នាំហើយបានអះអាងនៅពេលនោះថា គាត់បានទទួលអំណោយដ៏កម្រពីព្រះដោយអាចមើលឃើញអនាគត។

ចង់ដឹងថា ក្នុងឆ្នាំ២០២១ដែលកាន់តែខិតចូលមកជិតនាពេលខាងមុខនេះ តើលោកយាយទស្សន៍ទាយអ្វីខ្លះ តោះមកមើលជាមួយកម្ពុជាថ្មីទាំងអស់គ្នា៖

លោកយាយទស្សន៍ទាយថា ឆ្នាំ២០២១គឺជាឆ្នាំដែលការព្យាបាលជំងឺមហារីកត្រូវបានរកឃើញ។ លោកយាយ Baba Vanga អះអាងថា “នៅដើមសតវត្សរ៍ទី២១ មនុស្សជាតិនឹងកម្ចាត់ជំងឺមហារីកបាន។ ថ្ងៃនោះនឹងមកដល់នៅពេលដែលជំងឺមហារីកត្រូវជាប់ច្រវាក់ដែក”។

ប៉ុន្តែមិនមានរឿងល្អសម្រាប់លោកប្រធានាធិបតី Donald Trump ទេនៅពេលគាត់ចាកចេញពីសេតវិមាន។ លោកយាយទាយថា គាត់ទំនងជានឹងកើតមានជំងឺអាថ៌កំបាំងមួយ។

លោកយាយអះអាងថា ប្រធានាធិបតីសហរដ្ឋអាមេរិកទី៤៥រូបនេះនឹងធ្លាក់ខ្លួនឈឺដោយសារជំងឺអាថ៌កំបាំងដែលធ្វើឲ្យគាត់ថ្លង់ហើយបណ្តាលឲ្យមានការប៉ះទង្គិចខួរក្បាល”។

លោកយាយក៏បានទស្សន៍ទាយផងដែរថា សេដ្ឋកិច្ចអឺរ៉ុបនឹងធ្លាក់ចុះ, ប្រធានាធិបតីរុស្ស៊ីលោក Vladimir Putin ត្រូវរងការប៉ុនប៉ងធ្វើឃាតដោយនរណាម្នាក់នៅក្នុងប្រទេសរបស់គាត់ហើយក្រុមជ្រុលនិយមឥស្លាមនឹងធ្វើការវាយប្រហារនៅអឺរ៉ុប។

លោកយាយអះអាងថា “ពួកជ្រុលនិយមនឹងប្រើឃ្លាំងអាវុធគីមីប្រឆាំងនឹងទ្វីបអឺរ៉ុប”។

លោកយាយ Baba Vanga បានបន្ថែមទៀតថា “ពិភពលោកនឹងទទួលរងនូវគ្រោះមហន្តរាយនិងវិនាសកម្មជាច្រើន។ មនសិការរបស់មនុស្សនឹងផ្លាស់ប្តូរ។ គ្រាលំបាកនឹងមកដល់។ មនុស្សនឹងត្រូវបានបែងចែកដោយជំនឿរបស់ពួកគេ”។

រឿងមួយទៀតហាក់ដូចជាគួរឲ្យអស់សំណើចបន្តិចដែលលោកយាយសញ្ជាតិប៊ុលហ្គារីរូបនេះទាយថា ផលិតកម្មប្រេងឥន្ធនៈត្រូវបញ្ឈប់ រថភ្លើងនឹងហោះដោយប្រើពន្លឺព្រះអាទិត្យ។

ការព្យាករណ៍ដ៏ចម្លែកបំផុតរបស់គាត់គឺថា “នៅឆ្នាំ២០២១ នាគនឹងកាន់កាប់ភពផែនដី។ នាគដ៏ខ្លាំងមួយនឹងដណ្តើមយកមនុស្សជាតិ។ យក្សទាំងបីនឹងរួបរួមគ្នា មនុស្សមួយចំនួននឹងមានលុយក្រហម។ ខ្ញុំឃើញលេខ១០០, លេខ៥និងលេខសូន្យជាច្រើន”។

អ្នកបកប្រែបានសន្មតថា “នាគគឺជាប្រទេសចិន។ យក្សទាំងបីអាចជាប្រទេសរុស្ស៊ី ឥណ្ឌានិងចិនហើយប្រាក់អាចជាក្រដាស១០០យ័ននិង៥,០០០រូបដែលមានពណ៌ក្រហម”។

លោកយាយក៏ទាយដែរថា ក្នុងរយៈពេល២០០ឆ្នាំខាងមុខ យើងនឹងមានទំនាក់ទំនងជាមួយពួកភពផ្កាយ Alien។

លោកយាយទាយថា “ជីវិតនៅក្នុងចក្រវាឡនឹងត្រូវបានរកឃើញហើយភ្លាមៗនោះគេនឹងដឹងច្បាស់អំពីរបៀបដែលជីវិតនៅលើផែនដីបានលេចចេញជាលើកដំបូង។ មនុស្សនឹងមានទំនាក់ទំនងជាមួយបងប្អូនបង្កើតខាងផ្លូវងងឹតមកពីពិភពផ្សេង”។

យើងរង់ចាំមើលទាំងអស់គ្នាថាតើទំនាយរបស់លោកយាយនៅឆ្នាំក្រោយនេះត្រូវបានប៉ុន្មានភាគរយ៕

ប្រែសម្រួលដោយ៖ Vann Vann

ប្រភព៖ Mirror