ព្យុះត្រូពិក “Mulan” នឹងវាយប្រហារប្រទេសថៃ ចាប់ពីស្អែកទៅ

យោងតាមនាយកដ្ឋានឧតុនិយមថៃបានឲ្យដឹងថា ព្យុះត្រូពិក “Mulan” ដែលចាប់ផ្តើមនៅម៉ោង ៤ ទៀបភ្លឺថ្ងៃពុធទី១០ខែសីហា ក្នុងសមុទ្រចិនខាងត្បូង បានធ្វើដំណើរឆ្ពោះទៅកាន់ប្រទេសថៃ ហើយ។

ព្យុះនេះកំពុងធ្វើដំណើរក្នុងល្បឿន ២០ គីឡូម៉ែត្រក្នុងមួយម៉ោង ហើយត្រូវបានគេរំពឹងថានឹងបោកបក់លើកោះ Hainan របស់ប្រទេសចិនមុនគេ បន្ទាប់មកវាយប្រហារប្រទេសវៀតណាម រួចទៅដល់ប្រទេសថៃ នៅថ្ងៃស្អែក។

ភាគខាងជើងប្រទេសថៃ និងតំបន់មួយចំនួននៃភាគឦសាន អាចនឹងមានភ្លៀងធ្លាក់ខ្លាំង ហើយអាចបង្កជំនន់ទឹកភ្លៀង ចន្លោះពីថ្ងៃទី ១១ ដល់ ១៣ ខែសីហា។

ព្យុះ​ “Mulan” ត្រូវបានគេរំពឹងថានឹងនាំឲ្យមានទឹករលកខ្ពស់ៗ និងលក្ខខណ្ឌអាកាសធាតុអាក្រក់នៅក្នុងសមុទ្រ Andaman និងឈូងសមុទ្រខាងលើនៃប្រទេសថៃ។

អ្នកចេញទូកទៅសមុទ្រ ត្រូវមានការប្រុងប្រយ័ត្ន ហើយស្តាប់តាមការណែនាំរបស់នាយកដ្ឋាន និងត្រូវតាមដានព័ត៌មានថ្មីៗ៕

ប្រែសម្រួល៖ Vann Vann

ប្រភព៖ Thaiger

ចុចអាន៖ ព្យុះត្រូពិក Iota សម្លាប់មនុស្ស១៤នាក់នៅប្រទេស ហុងឌូរ៉ាស់