ព័ត៌មានអន្ដរជាតិ

បេសកជន UN ធ្វើដំណើរទៅ មីយ៉ាន់ម៉ា ជាលើកដំបូង

បានផុស

២ years មុន

នៅ

ថ្ងៃអង្គារ ១៦ សីហា ២០២២

ដោយ

កាលពីថ្ងៃចន្ទទី១៥ខែសីហា បេសកជនពិសេសរបស់អង្គការសហប្រជាជាតិ សម្រាប់ប្រទេសមីយ៉ាន់ម៉ា បានធ្វើដំណើរទៅកាន់ប្រទេសអាស៊ីអាគ្នេយ៍មួយនេះ ជាលើកដំបូងចាប់តាំងពីលោកស្រីត្រូវបានតែងតាំងឲ្យកាន់តំណែងកាលពីខែតុលាឆ្នាំមុន។

បេសកជនពិសេសរបស់អង្គការសហប្រជាជាតិ សម្រាប់ប្រទេសមីយ៉ាន់ម៉ា លោកស្រី Noeleen Heyzer

ដំណើររបស់លោកស្រី Noeleen Heyzer បានកើតឡើង បន្ទាប់ពីការអំពាវនាវចុងក្រោយបំផុតរបស់ក្រុមប្រឹក្សាសន្តិសុខអង្គការសហប្រជាជាតិ ឲ្យបញ្ចប់ជាបន្ទាន់ចំពោះអំពើហិង្សាគ្រប់ទម្រង់ និងការចូលមនុស្សធម៌ដោយគ្មានការរារាំង នៅក្នុងប្រទេសដែលហែកហួរដោយជម្លោះមួយនេះ។

អ្នកនាំពាក្យ UN លោក Stephane Dujarric បាននិយាយថា លោកស្រី Heyzer នឹងផ្តោតលើការដោះស្រាយស្ថានការណ៍កាន់តែយ៉ាប់យ៉ឺន និងការព្រួយបារម្ភជាបន្ទាន់ ក៏ដូចជាវិស័យអាទិភាពផ្សេងទៀតនៃអាណត្តិរបស់លោកស្រីផងដែរ។

ទោះបីជាយ៉ាងណាក៏ដោយ លោក Dujarric មិនបានផ្តល់ព័ត៌មានលម្អិតថាតើ លោកស្រី Heyzer នឹងជួបជាមួយមេដឹកនាំយោធាមីយ៉ាន់ម៉ា ឬអតីតមេដឹកនាំដែលកំពុងជាប់ឃុំក្នុងប្រទេសគឺលោកស្រី អ៊ុងសាន ស៊ូជី ដែលជាការទាមទារជាយូរមកហើយរបស់ UN ដែរឬក៏អត់នោះទេ។

កាលពីថ្ងៃចន្ទ លោកស្រី អ៊ុងសាន ស៊ូជី ត្រូវបានកាត់ទោស លើបទចោទប្រកាន់ពុករលួយបន្ថែមទៀត ដោយបន្ថែមរយៈពេលជាប់ពន្ធនាគារ៦ឆ្នាំទៀត លើទោសជាប់ពន្ធនាគារលើកមុន ដែលមានរយៈពេល១១ឆ្នាំ៕

ប្រែសម្រួល៖ Vann Vann

ប្រភព៖ CNA

ចុចអាន៖ តុលាការ មីយ៉ាន់ម៉ា កាត់ទោសលោកស្រី អ៊ុងសាន ស៊ូជី ជាប់ពន្ធនាគារ ៦ ឆ្នាំទៀត

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត