ចិន ដាក់ទណ្ឌកម្មក្រុមផ្ដាច់ខ្លួន តៃវ៉ាន់ ៧ នាក់ ដោយសារលោកស្រី Pelosi

គណបក្សកុម្មុយនិស្តចិនបានប្រកាសដាក់ទណ្ឌកម្មលើមន្ត្រី និងសមាជិកសភាតៃវ៉ាន់ចំនួន ៧ រូបជាការឆ្លើយតបទៅនឹងដំណើរទស្សនកិច្ចរបស់ប្រធានសភាអាមេរិកលោកស្រី Nancy Pelosi ទៅកាន់កោះតៃវ៉ាន់កាលពីថ្ងៃទី ២ ខែសីហាកន្លងទៅ ។

គណបក្សកាន់អំណាចចិនបាននិយាយនៅថ្ងៃអង្គារនេះថា នឹងដាក់ទណ្ឌកម្មលើក្រុមផ្តាច់ខ្លួនទាំងនេះសម្រាប់ការឃុបឃិតជាមួយកងកម្លាំងខាងក្រៅក្នុងការញុះញង់ឲ្យមានការតស៊ូមតិពាក់ព័ន្ធនឹង “ឯករាជ្យភាពតៃវ៉ាន់” ។

បុគ្គលគោលដៅទាំង ៧ នាក់នោះ រួមមានប្រធានការិយាល័យតំណាងរបស់តៃវ៉ាន់ក្នុងទីក្រុងវ៉ាស៊ីនតោនលោកស្រី Hsiao Bi-khim និងសមាជិកសភាមកពីគណបក្សវឌ្ឍនភាពប្រជាធិបតេយ្យ (DPP) ដែលកំពុងកាន់អំណាចរបស់តៃវ៉ាន់ ។

ទន្ទឹមនោះ ចិនក៏នឹងហាមឃាត់អ្នកទាំង ៧ នោះមិនឲ្យជាន់ដីគោក រួមទាំងតំបន់នៃទីក្រុងហុងកុង និងម៉ាកាវ ហើយសហគ្រាសដែលទាក់ទងនឹងពួកគេ ក៏ដូចជាអ្នកឧបត្ថម្ភរបស់ពួកគេ ក៏ត្រូវបានហាមឃាត់ដូចគ្នាមិនឲ្យចូលរួមក្នុងសកម្មភាពរកប្រាក់ចំណេញនៅលើដីគោករបស់ចិនផងដែរ ។

ជាចុងក្រោយគណបក្សកុម្មុយនិស្តបានសង្កត់ធ្ងន់ថា សកម្មភាពរបស់ពួកគេកាន់តែមានភាពសាហាវឃោរឃៅ ជាពិសេសក្នុងអំឡុងដំណើរទស្សនកិច្ចរបស់លោកស្រី Pelosi ដោយបង្ហាញភាពរឹងចចេសបន្ថែមទៀតក្នុងការស្វែងរក “ឯករាជ្យភាពតៃវ៉ាន់” ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ អាមេរិក ថា សមយុទ្ធយោធាចុងក្រោយរបស់ ចិន លើកោះតៃវ៉ាន់ជា “ប្រតិកម្មហួសហេតុ”