ក្រោយស្វាមីជាសះស្បើយ ពេលនេះជំទាវទី ១ Jill Biden ឆ្លងកូវីដវិញម្ដង

ជំទាវទីមួយ Jill Biden បានធ្វើតេស្តវិជ្ជមានកូវីដ ១៩ កាលពីថ្ងៃអង្គារ បន្ទាប់ពីស្វាមីរបស់ លោកស្រីគឺ ប្រធានាធិបតី Joe Biden ទើបតែបញ្ចប់ការធ្វើចត្តាឡីស័ក ក្រោយជាសះស្បើយកាលពីពេលថ្មីៗនេះ ។

បើតាមលោកស្រី Elizabeth Alexander នាយកផ្នែកទំនាក់ទំនងបាននិយាយថា “បើទោះជាលោកស្រីបានធ្វើតេស្តអវិជ្ជមានជាបន្តបន្ទាប់ អំឡុងការធ្វើតេស្តរហ័សជាប្រចាំថ្ងៃក៏ដោយ ប៉ុន្តែក្រោយមកជំទាវទីមួយវ័យ ៧១ ឆ្នាំរូបនេះ បាន ចាប់ផ្ដើមមានរោគសញ្ញាដូចជា គ្រុនក្ដៅ និងផ្ដាសាយនៅពេលល្ងាច ហើយនៅពេលធ្វើតេស្តម៉ាស៊ីនធំ PCR ទើបរកឃើញថាលោកស្រីវិជ្ជមានកូវីដ“ ។

អ្នកនាំពាក្យរូបនេះបានបញ្ជាក់បន្ថែមទៀតថា បច្ចុប្បន្ននេះលោកស្រី Jill Biden មានរោគសញ្ញាស្រាល និងមិនគួរឲ្យបារម្ភទេ ។ លោកស្រីក៏ត្រូវបានចេញវេជ្ជបញ្ជាឲ្យប្រើថ្នាំ Paxlovid ដែលជាថ្នាំប្រឆាំងមេរោគដ៏ចម្រូងចម្រាសផលិត ដោយក្រុមហ៊ុន Pfizer បើទោះជាឥស្សរជនជាន់ខ្ពស់ជាច្រើន រួមទាំងលោក Joe Biden និងប្រធានទីប្រឹក្សាវេជ្ជសាស្ត្រសេតវិមានលោក Anthony Fauci បានធ្វើទុក្ខ បន្ទាប់ពីលេបថ្នាំនេះក៏ដោយ ៕

ប្រែសម្រួល៖ សាង ស្រីល័ក្ខ

ប្រភព៖sputnik

ចុចអាន៖ផ្ទុះគ្រាប់បែក ១១ កន្លែងក្នុងខេត្តចំនួន ៣ ផ្សេងគ្នានៅភាគខាងត្បូង ថៃ