មេ UN នឹងទៅ អ៊ុយក្រែន ម្ដងទៀត ជួបមនុស្សសំខាន់ ២ រូប

អង្គការសហប្រជាជាតិ (UN) និយាយថា លោកអគ្គលេខាធិការ Antonio Guterres នឹងធ្វើទស្សនកិច្ចនៅទីក្រុង Lviv ភាគខាងលិចអ៊ុយក្រែននៅថ្ងៃព្រហស្បតិ៍នេះដើម្បីជួបជាមួយប្រធានាធិបតី Volodymyr Zelensky និងប្រធានាធិបតីតួកគីលោក Recep Tayyip Erdogan ។

ដំណើរ​ទស្សនកិច្ច​ទៅកាន់អ៊ុយក្រែនលើកនេះ​នឹង​ក្លាយ​ជា​លើក​ទី​ ២ របស់​លោក Guterres ចាប់​តាំង​ពី​រុស្ស៊ី​បាន​ចាប់​ផ្តើម​សង្គ្រាមលុកលុយមកលើទីក្រុងកៀវ ខណៈលើកដំបូងរបស់លោកគឺនៅក្នុងខែមេសា ។

ទន្ទឹមនោះអ្នកនាំពាក្យ UN បានប្រាប់អ្នកសារព័ត៌មានកាលពីថ្ងៃអង្គារថា អ្នកទាំងបីនឹងផ្លាស់ប្តូរទស្សនៈស្តីពីការនាំចេញផលិតផលកសិកម្មដែលបានព្រមព្រៀងដោយរុស្ស៊ី និងអ៊ុយក្រែន ក៏ដូចជាសម្របសម្រួលដោយតួកគី និងអង្គការសហប្រជាជាតិ ។

ចំណែកនៅថ្ងៃសុក្រ លោក Guterres នឹងទៅកាន់ទីក្រុង Odesa ភាគខាងត្បូង ដើម្បីចុះមើលកំពង់ផែមួយក្នុងចំណោមកំពង់ផែដែលត្រូវបានប្រើប្រាស់សម្រាប់ការនាំចេញកសិផល ខណៈលោកអគ្គលេខាធិការក៏ត្រូវបានគេរំពឹងថានឹងជួបប្រជុំទ្វេភាគីជាមួយលោក Zelensky ផងដែរ ។

ជាចុងក្រោយអ្នកនាំពាក្យ UN បញ្ជាក់ថា អ្នកទាំងបីក៏នឹងពិភាក្សាអំពីតម្រូវការ ក៏ដូចជា​ដំណោះស្រាយ​នយោបាយ​ចំពោះ​ជម្លោះបច្ចុប្បន្ន ជាពិសេសគឺពិភាក្សាអំពីស្ថានភាពនៅរោងចក្រនុយក្លេអ៊ែរ Zaporizhzhia ដែលការវាយប្រហារកំពុងបន្តផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ ម្ចាស់បំណុលរបស់ អ៊ុយក្រែន ព្រមតាមការសុំពន្យារពេលសងប្រាក់កម្ចី ២០ ពាន់លានដុល្លារ