ព័ត៌មានអន្ដរជាតិ

ពូទីន បង្អួតសព្វាវុធទំនើបៗ រួមទាំង ការធ្វើតេស្តខួរក្បាល “កំពូលទាហាន” ក្នុងពិព័រណ៍កងទ័ពឆ្នាំ ២០២២ (មានវីដេអូ)

បានផុស

៣ years មុន

នៅ

ថ្ងៃសុក្រ ១៩ សីហា ២០២២

ដោយ

លោក វ្ល៉ាឌីមៀរ ពូទីន បានបង្ហាញអាវុធយោធាទំនើបៗរបស់រុស្ស៊ីនៅសប្តាហ៍នេះ ខណៈលោកបានបង្អួតរថក្រោះ មីស៊ីល និងការធ្វើតេស្តខួរក្បាល “កំពូលទាហាន”។

ក្នុងសន្និបាតអាវុធប្រចាំឆ្នាំនៅជាយក្រុងមូស្គូ មេដឹកនាំរុស្ស៊ីអាយុ៦៩ឆ្នាំរូបនេះ អួតថា សព្វាវុធរបស់ទាហានគាត់គឺ ដើរមុនបស្ចិមប្រទេសច្រើនទសវត្សរ៍។

រថក្រោះប្រយុទ្ធធុន T-72, រថពាសដែក BMP K-17 និងគ្រាប់កាំភ្លើងត្បាល់ធុនធ្ងន់ផលិតដោយខ្លួនឯងប្រភេទ Tulpan សុទ្ធតែត្រូវបានដាក់បង្អួតដល់អ្នកទិញបរទេស ក្នុងពិព័រណ៍កងទ័ពឆ្នាំ២០២២នៅឧទ្យាន Patriot Park នៃតំបន់ Alabino។

លោកពូទីននិយាយថា គំរូទំនើបនៃសព្វាវុធយោធាជាង ២៨ ០០០ កំពុងត្រូវបានបង្ហាញដោយក្រុមហ៊ុនផលិតរុស្ស៊ីចំនួន ១៥០០ ទៅកាន់ប្រតិភូមកពី ៧២ប្រទេស។

ទាហានរុស្ស៊ីម្នាក់ ត្រូវបានគេថតជាប់ កំពុងត្រៀមខ្លួនសម្រាប់ “ការធ្វើតេស្តខួរក្បាល” ក្នុងការតាំងពិព័រណ៍យោធាដ៏ធំនោះ។ ទាហានហាត់ការក្នុងឯកសណ្ឋានយោធា ត្រូវបានមន្ត្រីម្នាក់យកខ្សែលោហធាតុភ្ជាប់ជាមួយក្បាលទៅនឹង ដ្យាក្រាមដ៏ស្មុគស្មាញមួយនៅផ្ទៃខាងក្រោយ។

លោក ពូទីន ធ្លាប់អះអាងថា “កំពូលទាហាន” ដែលត្រូវបានកែប្រែហ្សែន មិនអាចមានអារម្មណ៍ ឈឺចាប់ ឬភ័យខ្លាច អាចក្លាយជាការពិតក្នុងពេលឆាប់ៗនេះ។

ឆ្កែយន្ត ក៏ត្រូវបានបង្ហាញផងដែរ។ គេឃើញឆ្កែយន្តនេះ ធ្វើចលនាដោយមានបំពាក់ជាមួយជើងទម្របាញ់រ៉ុកកែតនៅលើខ្នង។ រ៉ូបូតដែលស្លៀកពាក់ដូច និនចា មួយនេះ មានសមត្ថភាពក្រាបលូនលើឥដ្ឋ ដែលធ្វើឲ្យសត្រូវកាន់តែពិបាកមើល ពេលដែលវារង់ចាំបាញ់រ៉ុកកែត។

យោងតាមទីភ្នាក់ងារសារព័ត៌មានរដ្ឋ RIA Novosti របស់រុស្ស៊ី បានឲ្យដឹងថា មនុស្សយន្តដែលត្រូវបានគេហៅថាប្រព័ន្ធ M-81 មួយនេះ នឹងអាចដឹកជញ្ជូនអាវុធ និងគ្រាប់រំសេវ ហើយបាញ់ ក្នុងពេលប្រយុទ្ធ។

ស្របពេលជាមួយគ្នានោះ គំរូរថយន្ត Ural ដែលជារថយន្តយោធាបើកបរដោយខ្លួនឯងដំបូងគេបង្អស់ និងអាចធ្វើដំណើរបានរហូតដល់ទៅ ៨០ គីឡូម៉ែត្រក្នុងមួយម៉ោងក៏ត្រូវបានដាក់តាំងបង្ហាញផងដែរ។

គួរបញ្ជាក់ថា ប្រទេសរុស្ស៊ីជាប់ចំណាត់ថ្នាក់លេខ ២ បន្ទាប់ពីសហរដ្ឋអាមេរិក ជាប្រទេសលក់អាវុធច្រើនបំផុត ដោយលក់បានជិត ១៥ពាន់លានដុល្លារក្នុងមួយឆ្នាំ ពោលគឺជិតមួយភាគប្រាំនៃទីផ្សារនាំចេញសកល៕