ពូទីន អនុញ្ញាត​ឲ្យ​ UN ចូលត្រួតពិនិត្យ​​រោងចក្រ​នុយក្លេអ៊ែរ Zaporizhzhia

មេដឹកនាំរុស្ស៊ី លោក វ្ល៉ាឌីមៀរ ពូទីន បាននិយាយថា មន្ត្រីអង្គការសហប្រជាជាតិ (UN) នឹងត្រូវបានអនុញ្ញាតឲ្យធ្វើទស្សនកិច្ច និងត្រួតពិនិត្យរោងចក្រនុយក្លេអ៊ែរ Zaporizhzhia។

វិមានក្រឹមឡាំង បានធ្វើសេចក្តីប្រកាសបែបនេះ បន្ទាប់ពីការហៅទូរស័ព្ទរវាងលោកពូទីននិងប្រធានាធិបតីបារាំងលោក Emmanuel Macron។

សេចក្តីប្រកាសនេះកើតឡើងចំពេលមានការអះអាងថា ការប្រយុទ្ធគ្នាក្បែររោងចក្រនេះ នៅតែបន្ត ដោយជនស៊ីវិលបួននាក់ ត្រូវគេរាយការណ៍ថា រងរបួសដោយការបាញ់ផ្លោងរបស់រុស្ស៊ី។

ក្នុងសេចក្តីថ្លែងការណ៍បន្ទាប់ពីការហៅទូរស័ព្ទរវាងមេដឹកនាំបារាំង និងរុស្ស៊ី, វិមានក្រឹមឡាំងបាននិយាយថា លោកពូទីន បានយល់ព្រមផ្តល់ជំនួយចាំបាច់ដល់អ្នកស៊ើបអង្កេត UN ដើម្បីចូលទៅកាន់រោងចក្រនុយក្លេអ៊ែរ Zaporizhzhia។

វិមានក្រឹមឡាំងនិយាយថា “មេដឹកនាំទាំងពីរ បានកត់សម្គាល់ពីសារសំខាន់ នៃការបញ្ជូនអ្នកជំនាញរបស់ទីភ្នាក់ងារថាមពលបរមាណូអន្តរជាតិ (IAEA) ទៅកាន់រោងចក្រនេះ សម្រាប់ការវាយតម្លៃអំពីស្ថានភាពនៅលើដី”។

ស្របពេលជាមួយគ្នានោះ អគ្គនាយក IAEA បានស្វាគមន៍ចំពោះសេចក្តីថ្លែងការណ៍របស់លោកពូទីន ហើយនិយាយថា លោកមានឆន្ទៈដឹកនាំដំណើរទស្សនកិច្ចទៅកាន់រោងចក្រនេះដោយខ្លួនឯង។

លោក Rafael Grossi និយាយថា “នៅក្នុងស្ថានភាពដែលងាយនឹងបង្កហេតុ និងផុយស្រួយ វាមានសារសំខាន់ណាស់ដែលកុំឲ្យមានសកម្មភាពថ្មីណាមួយ ដែលអាចបង្កគ្រោះថ្នាក់បន្ថែមទៀតដល់សុវត្ថិភាព និងសន្តិសុខនៃរោងចក្រថាមពលនុយក្លេអ៊ែរដ៏ធំបំផុតមួយរបស់ពិភពលោក”។

គួរបញ្ជាក់ថា រោងចក្រនេះស្ថិតនៅក្រោមការកាន់កាប់របស់រុស្ស៊ីតាំងពីដើមខែមីនា ប៉ុន្តែអ្នកបច្ចេកទេសអ៊ុយក្រែន នៅតែដំណើរការរោងចក្រក្រោមការដឹកនាំរបស់រុស្ស៊ី៕

ប្រែសម្រួល៖ Vann Vann

ប្រភព៖ BBC

ចុចអាន៖ លោក ស៊ី និង ពូទីន នឹងចូលរួមកិច្ចប្រជុំកំពូល G20 នៅកោះបាលី ក្នុងខែវិច្ឆិកា