អូស្ត្រាលី ធ្វើសមយុទ្ធដែនអាកាសជាមួយប្រទេស ១៧ ផ្សេងទៀត

កងកម្លាំង​អាកាស​របស់ប្រទេស​អូស្ត្រាលី​បាន​ចាប់ផ្តើម​សមយុទ្ធ​ចម្រុះ​ជាតិសាសន៍​នៅ​ភាគ​ខាងជើង​ ជាមួយនឹងប្រទេសចំនួន ១៧ ផ្សេងទៀតដែលភាគច្រើនសុទ្ធតែមិនធ្លាប់ចូលរួមពីមុនមក ខណៈប្រទេសជប៉ុន កូរ៉េខាងត្បូង និងអាល្លឺម៉ង់គឺជាលើកដំបូងសម្រាប់ការចូលរួមនេះ ។

នៅក្នុងពិធីបើកនៅទីក្រុង Darwin កាលពីថ្ងៃសៅរ៍ មេបញ្ជាការទ័ពអាកាសលោក Darren Goldie បានស្វាគមន៍ចំពោះការចូលរួមរបស់យន្តហោះចម្បាំងមកពីជុំវិញពិភពលោក ហើយលោកបាននិយាយថា សមយុទ្ធនេះបានឆ្លុះបញ្ចាំងពីលទ្ធភាព និងសក្តានុពលជាសកលរបស់កងកម្លាំងទ័ពអាកាសអូស្ត្រាលី ក្នុងកិច្ចសហប្រតិបត្តិការជាមួយសមភាគីផ្សេងៗ ។

ចំណែកកងកម្លាំងស្វ័យការពារដែនអាកាសរបស់ប្រទេសជប៉ុនបានបញ្ជូនយន្តហោះចម្បាំង F-2 ទៅធ្វើសមយុទ្ធនេះ ហើយ​រំពឹង​ថា​នឹង​ចូលរួម​ក្នុង​ការ​ប្រយុទ្ធ ការ​ចាក់​ប្រេង​សាំងនៅ​កណ្តាល​អាកាស និង​សមយុទ្ធ​ផ្សេង​ទៀត​ក្នុង​រយៈពេល​ប្រហែល ៣ ​សប្តាហ៍ ។

ដោយឡែកលោក Tom Corben អ្នកជំនាញបញ្ហាសន្តិសុខឥណ្ឌូប៉ាស៊ីហ្វិកនៅមជ្ឈមណ្ឌលសិក្សាសហរដ្ឋអាមេរិកនៃសាកលវិទ្យាល័យស៊ីដនីបាននិយាយថា អូស្ត្រាលីកំពុងព្យាយាមកសាងទំនាក់ទំនងការពារជាតិឲ្យកាន់តែស៊ីជម្រៅជាមួយប្រទេសជាច្រើនតាមដែលអាចធ្វើបាននៅទូទាំងតំបន់ ។

ជាចុងក្រោយលោក Corben បានកត់សម្គាល់ថា សមយុទ្ធយោធាដែលពាក់ព័ន្ធនឹងបណ្តាប្រទេសអឺរ៉ុបទាំងនេះទំនងជាពង្រឹងការរារាំងប្រឆាំងនឹងការអះអាងដែនសមុទ្រដែលកំពុងកើនឡើងរបស់ចិន ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ លោក Xi Jinping សុំឲ្យប្រធានាធិបតី អាមេរិក រារាំងលោកស្រី Pelosi មកតៃវ៉ាន់ តែលោក Biden បដិសេធ