ចិន ប្រកាសធ្វើសមយុទ្ធយោធាថ្មីជាមួយហុងកុង និងម៉ាកាវ នៅសមុទ្រខាងត្បូង

អាជ្ញាធរសុវត្ថិភាពដែនសមុទ្ររបស់ប្រទេសចិននៅក្នុងខេត្ត Guangdong បាននិយាយកាលពីថ្ងៃសៅរ៍ថា សមយុទ្ធយោធាថ្មីមួយនឹងត្រូវធ្វើឡើងនៅថ្ងៃទី ២៣ ខែសីហា រវាងទីក្រុងម៉ាកាវ និងទីក្រុងហុងកុង នៅឯឆ្នេរសមុទ្រភាគខាងត្បូង ។

ទន្ទឹមនោះអាជ្ញាធរក៏បានប្រកាសពីការហាមឃាត់ការធ្វើចរាចរតាមសមុទ្រនៅក្នុងតំបន់ដែលបានកំណត់ផងដែរ ក្នុងអំឡុងពេលធ្វើសមយុទ្ធដែលនឹងធ្វើឡើងនៅមាត់ទន្លេ Zhu Jiang និងក្បែរកោះ Wailingding ចាប់ពីម៉ោង ៧ ព្រឹកដល់ម៉ោង ២ រសៀល និងចាប់ពីម៉ោង ៦ ល្ងាចដល់ម៉ោង ១១ យប់ ។

ប្រទេសចិនបានចាប់ផ្តើមហ្គេមសង្រ្គាមជាបន្តបន្ទាប់នៅជិតតៃវ៉ាន់ ជាកោះដែលខ្លួនអះអាងថាជាទឹកដីរបស់ខ្លួន បន្ទាប់ពីប្រធានសភាអាមេរិកលោកស្រី Nancy Pelosi បានធ្វើដំណើរទស្សនកិច្ចទៅទីក្រុងតៃប៉ិកាលពីថ្ងៃទី ២ ខែសីហា បូករួមជាមួយនឹងសមាជិកសភាគណបក្សប្រជាធិបតេយ្យមួយក្រុមផ្សេងទៀតក៏បានហោះហើរទៅកាន់កោះនេះផងដែរ នៅប៉ុន្មានថ្ងៃក្រោយមក ។

ពាក់ព័ន្ធនឹងបញ្ហានេះដែរ អ្នកនាំពាក្យក្រសួងការបរទេសចិន លោក Wang Wenbin បាននិយាយកាលពីថ្ងៃព្រហស្បតិ៍ថា សមយុទ្ធយោធារបស់ចិននៅជិតកោះតៃវ៉ាន់ គឺ “ចាំបាច់ និងស្របច្បាប់” ហើយវាក៏ជាការឆ្លើយតបទៅនឹងការបង្កហេតុរបស់សហរដ្ឋអាមេរិក ក៏ដូចជាជំហានមួយដើម្បីរក្សាអធិបតេយ្យភាព និងបូរណភាពទឹកដីរបស់ប្រទេសចិន ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ លោក Xi Jinping សុំឲ្យប្រធានាធិបតី អាមេរិក រារាំងលោកស្រី Pelosi មកតៃវ៉ាន់ តែលោក Biden បដិសេធ