រុស្ស៊ី ប្ដេជ្ញាសងសឹកអ្នកបំផ្ទុះគ្រាប់បែកសម្លាប់កូនស្រីសម្ព័ន្ធមិត្តលោក ពូទីន (មានវីដេអូ)

ប្រទេសរុស្ស៊ីកំពុងស្ដីបន្ទោស និងចង្អុលចំៗលើអ៊ុយក្រែន បន្ទាប់ពីការបំផ្ទុះគ្រាប់បែករថយន្តសម្លាប់នាង Darya Dugina កូនស្រីរបស់លោក Aleksandr Dugin ដែលជាសម្ព័ន្ធមិត្តលោកប្រធានាធីបតី វ្ល៉ាឌីមៀ ពូទីន និង​ប្តេជ្ញា​សងសឹកអ្នកដែលជាប់ពាក់ព័ន្ធទាំងអស់ផងដែរ ។

ការប្ដេជ្ញាសងសឹកនេះបានកើតឡើង បន្ទាប់ពីសេវាសន្តិសុខសហព័ន្ធរុស្ស៊ី (FSB) កាលពីពេលថ្មីៗនេះបានបង្ហាញជាសាធារណៈនូវវីដេអូនៃជនជាតិអ៊ុយក្រែនឈ្មោះ Natalya Vovk ដែលត្រូវបានគេកំណត់ថា ជាជនសង្ស័យដ៏សំខាន់ក្នុងករណីបំផ្ទុះរថយន្តកាលពីថ្ងៃសៅរ៍ ទី២០ ខែសីហា ដែលបានសម្លាប់អ្នកកាសែតឈ្មោះ Darya Dugina នៅទីក្រុងមូស្គូ ។

ជនជាតិអ៊ុយក្រែនវ័យ ៤៣ ឆ្នាំរូបនេះបានជិះរថយន្ត Mini Cooper មកដល់ប្រទេសរុស្ស៊ីកាលពីថ្ងៃទី ២៣ ខែកក្កដា ខណៈដែលនៅថ្ងៃអាទិត្យ ក្រោយការបំផ្ទុះគ្រាប់បែក, នាង Vovk បានបើកឡានទៅប្រទេសអេស្តូនីដើម្បីរត់គេចខ្លួន ។

គួររំឭកថា ឧបទ្ទវហេតុនៃការផ្ទុះឆេះរថយន្តសម្លាប់នាង Darya Dugina បានកើតឡើងនៅលើផ្លូវហាយវេមួយកន្លែងចម្ងាយប្រហែល ២០ គីឡូម៉ែត្រភាគខាងលិចនៃទីក្រុងមូស្គូនៅវេលាម៉ោង ២១ និង ៣៥ នាទី ។ យោងតាមរូបថត និងវីដេអូពីកន្លែងកើតហេតុបានឲ្យដឹងថា រថយន្តដែលគេស្គាល់ថាម៉ាក Land Cruiser Prado បានឆាបឆេះយ៉ាងសន្ធោសន្ធៅ រួចក៏ជ្រុលទៅបុករបងផ្ទះប្រជាពលរដ្ឋ ៕

សូមទស្សនាវីដេអូ!

ប្រែសម្រួលដោយ ៖ ជីវ័ន្ត

ប្រភព ៖ Sky News

ចុចអាន ៖ រុស្ស៊ី បង្ហាញមុខជនសង្ស័យ ក្នុងករណីធ្វើឃាត កូនស្រីសម្ព័ន្ធមិត្ត លោក ពូទីន (មានវីដេអូ)