អាមេរិក ផ្អាកជើងហោះហើរទៅចិន ជាការសងសឹក ចំពោះទង្វើរបស់ក្រុង ប៉េកាំង (មានវីដេអូ)

រដ្ឋាភិបាលអាមេរិក បាននិយាយកាលពីថ្ងៃព្រហស្បតិ៍ទី២៥ខែសីហាថា ខ្លួននឹងផ្អាកជើងហោះហើរត្រង់ អាមេរិក-ចិន ចំនួន ២៦ ជើងរបស់ក្រុមហ៊ុនអាកាសចរណ៍ចិនចំនួន ៤ ដើម្បីឆ្លើយតបទៅនឹងការសម្រេចចិត្តរបស់រដ្ឋាភិបាលក្រុងប៉េកាំង ក្នុងការផ្អាកជើងហោះហើររបស់ក្រុមហ៊ុនអាកាសចរណ៍អាមេរិកមួយចំនួន ជុំវិញករណីជំងឺកូវីដ១៩។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការសម្រេចចិត្តនេះ នឹងប៉ះពាល់ដល់ជើងហោះហើររបស់ក្រុមហ៊ុន Xiamen, Air China, China Southern Airlines និង China Eastern Airlines ចាប់ពីថ្ងៃទី៥ខែកញ្ញា ដល់ថ្ងៃទី២៨ខែកញ្ញា។

ពាក់ព័ន្ធការសម្រេចចិត្តនេះ នាយកដ្ឋានដឹកជញ្ជូនសហរដ្ឋអាមេរិក (USDOT) បានលើកឡើង​ ចំពោះការដែលចិន លុបចោលជើងហោះហើររបស់ក្រុមហ៊ុនអាកាសចរណ៍អាមេរិក Delta Air Lines និង United Airlines ចំនួន២៦ជើងនាពេលថ្មីៗនេះពាក់ព័ន្ធករណីជំងឺកូវីដ១៩។

ការផ្អាកនេះ រួមមានជើងហោះហើរ ហោះត្រង់ពីទីក្រុង Los Angeles ទៅកាន់ប្រទេសចិនចំនួន១៩ជើង និងជើងហោះហើររបស់ក្រុមហ៊ុន China Eastern ដែលហោះចេញពីទីក្រុង New York ចំនួន៧ជើង។

អ្នកនាំពាក្យស្ថានទូតចិន ប្រចាំទីក្រុងវ៉ាស៊ីនតោន លោក Liu Pengyu បាននិយាយថា សកម្មភាពរបស់ USDOT គឺ គ្មានការទទួលខុសត្រូវទាល់តែសោះ និងជាការផ្អាកជើងហោះហើររបស់ក្រុមហ៊ុនអាកាសចរណ៍ចិន ដោយគ្មានមូលដ្ឋាន។

ស្ថានទូតនិយាយថា វិធានការទប់ស្កាត់កូវីដរបស់ចិន មានភាពយុត្តិធម៌ និងតម្លាភាព ដោយអនុវត្តទាំងក្រុមហ៊ុនអាកាសចរណ៍ចិន និងបរទេស ហើយស្របតាមកិច្ចព្រមព្រៀងដឹកជញ្ជូនតាមផ្លូវអាកាសទ្វេភាគី។

USDOT បាននិយាយថា គិតត្រឹមថ្ងៃទី៧ខែសីហា អាជ្ញាធរចិនបានកែប្រែគោលនយោបាយរបស់ពួកគេ ដូច្នេះប្រសិនបើចំនួនអ្នកដំណើរនៅលើជើងហោះហើរទៅកាន់ប្រទេសចិន ធ្វើតេស្តវិជ្ជមានជំងឺកូវីដ១៩ ឈានដល់៤ភាគរយនៃចំនួនសរុប នោះជើងហោះហើរមួយនឹងត្រូវផ្អាក ហើយប្រសិនបើវាឈានដល់៨ភាគរយ ជើងហោះហើរពីរនឹងត្រូវផ្អាក៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ CNA 

ចុចអាន៖ ចិន៖ ពិភពលោក ឃើញច្បាស់ហើយថា អ្នកណា រករឿងអ្នកណា លើបញ្ហាកោះតៃវ៉ាន់