ព័ត៌មានអន្ដរជាតិ

រុស្ស៊ី ថា យោធា អ៊ុយក្រែន នឹងធ្វើរដ្ឋប្រហារ បើលោក Zelensky នៅតែបែបនេះ

បានផុស

២ years មុន

នៅ

ថ្ងៃសុក្រ ២៦ សីហា ២០២២

ដោយ

អតីតប្រធានាធិបតីរុស្ស៊ីលោក Dmitry Medvedev បានព្យាករណ៍ថា យោធាអ៊ុយក្រែនអាចនឹងធ្វើរដ្ឋប្រហារនៅទីក្រុងកៀវ ដោយសារតែរដ្ឋាភិបាលស៊ីវិលរបស់លោកប្រធានាធិបតី Volodymyr Zelensky បដិសេធមិនចរចាសន្តិភាពជាមួយរុស្ស៊ី ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Medvedev ដែលបច្ចុប្បន្នជាអនុប្រធានក្រុមប្រឹក្សាសន្តិសុខជាតិរុស្ស៊ីបានគូសបញ្ជាក់អំពីសេណារីយ៉ូនេះថា មានជម្រើស ២ ដែលលោកជឿជាក់ថា អ៊ុយក្រែនអាចទទួលយក គឺរដ្ឋាភិបាលរបស់លោក Zelensky ត្រូវកែតម្រូវជំហររបស់ខ្លួនវិញ និងយល់ព្រមតាមលក្ខខណ្ឌរបស់រុស្ស៊ីសម្រាប់ការបញ្ចប់អរិភាព ។

ទីក្រុងម៉ូស្គូបានប្រកាសតំបន់គ្មានយោធា និងកម្ចាត់ពួក neo-Nazi របស់អ៊ុយក្រែន ជាគោលដៅនៃប្រតិបត្តិការយោធារបស់ខ្លួនក្នុងប្រទេសនេះ ។ ដើមឡើយទីក្រុងកៀវមានឆន្ទៈក្នុងការទទួលយកឋានៈអព្យាក្រឹត ប៉ុន្តែក្រោយមកបានផ្លាស់ប្ដូរជំហរ ដោយសារតែជំនួយយោធារបស់លោកខាងលិច ។

ទន្ទឹមនោះលោក Zelensky ក៏បានប្រកាសដែរថា ការកម្ចាត់រុស្ស៊ីនៅលើសមរភូមិ និងដណ្តើមយកទឹកដីទាំងអស់ដែលស្ថិតនៅក្រោមការគ្រប់គ្រងរបស់ទីក្រុងកៀវ មុនឆ្នាំ ២០១៤ គឺជាជម្រើសតែមួយគត់ដែលអាចធ្វើទៅបានសម្រាប់ប្រទេសរបស់គាត់ ។

គួរបញ្ជាក់ថា រហូតមកដល់ពេលនេះសង្គ្រាមលុកលុយរបស់រុស្ស៊ីលើអ៊ុយក្រែនដែលលោកប្រធានាធិបតី វ្ល៉ាឌីមៀ ពូទីន ចាត់ទុកជាប្រតិបត្តិការយោធាពិសេសបានអូសបន្លាយពេលជាង ៦ ខែមកហើយ បន្ទាប់ពីផ្ទុះការវាយលុកកាលពីថ្ងៃទី២៤ ខែកុម្ភៈ ៕

ប្រែសម្រួលដោយ ៖ ជីវ័ន្ត

ប្រភព ៖ RT

ចុចអាន ៖ លោក Zelensky ថា អ៊ុយក្រែន នឹងបន្តប្រយុទ្ធជាមួយ រុស្ស៊ី ដល់ទីអវសាន (មានវីដេអូ)