ប៊ុលហ្គារី ចង់ចាប់ផ្តើមទិញឧស្ម័នពី រុស្ស៊ី វិញ

រដ្ឋមន្ត្រីក្រសួងថាមពលប៊ុលហ្គារី លោក Rosen Hristov បានប្រាប់ទូរទស្សន៍ Nova TV កាលពីថ្ងៃសុក្រទី២៦ខែសីហាថា រដ្ឋាភិបាលរបស់លោក កំពុងពិចារណារៀបចំកិច្ចពិភាក្សាជាមួយក្រុមហ៊ុនថាមពលយក្ស Gazprom ស្តីពីការចាប់ផ្តើមនាំចូលឧស្ម័នធម្មជាតិពីរុស្ស៊ី ឡើងវិញ។

លោកនិយាយថា “នៅតែមិនមានកិច្ចពិភាក្សាសកម្មជាមួយក្រុមហ៊ុន Gazprom ប៉ុន្តែយើងបានផ្តល់ការចង្អុលបង្ហាញថា យើងចង់ចាប់ផ្តើមការចរចា ជាជាងបន្តឲ្យពួកគេបញ្ជាក់ពីលក្ខខណ្ឌដ៏ចម្រូងចម្រាសមួយចំនួននៃកិច្ចសន្យា។ យើងគ្រាន់តែផ្តល់ព័ត៌មានថា យើងបានត្រៀមខ្លួនចរចា ហើយបានស្នើឲ្យពួកគេបន្តទំនាក់ទំនង”។

លោកបញ្ជាក់ថា ទីក្រុង សូហ្វ៊ីយ៉ា រំពឹងថានឹងមានការឆ្លើយតបពីក្រុមហ៊ុនរុស្ស៊ី យូរបំផុតត្រឹមសប្តាហ៍ក្រោយ។ លោក​សង្កត់​ធ្ងន់​ថា “យើង​និយាយ​តែ​ពី​កិច្ច​សន្យា​ចាស់​ប៉ុណ្ណោះ។ យើង​នឹង​មិន​ចុះ​ហត្ថលេខា​ឡើង​វិញ ឬ​ចរចា​លើ​កិច្ច​សន្យា​ថ្មី​ឡើយ”។

គួរបញ្ជាក់ជាថ្មី កាលពីខែមេសា ប្រទេសប៊ុលហ្គារី បានបដិសេធវិធីទូទាត់ប្រាក់ Ruble សម្រាប់ឧស្ម័នដែលណែនាំដោយរុស្ស៊ី ជាការឆ្លើយតបទៅនឹងទណ្ឌកម្មរបស់លោកខាងលិច។

នៅក្រោមបទប្បញ្ញត្តិថ្មី អ្នកទិញមកពីប្រទេសដែលដាក់កំហិតលើទីក្រុងមូស្គូ ត្រូវមានកាតព្វកិច្ចបង់ជាប្រាក់ Ruble សម្រាប់ឧស្ម័នធម្មជាតិរបស់រុស្ស៊ី។ ការបដិសេធរបស់ទីក្រុង សូហ្វ៊ីយ៉ា ក្នុងការទទួលយកលក្ខខណ្ឌថ្មីនេះ បានជំរុញឲ្យក្រុមហ៊ុន Gazprom បញ្ឈប់ការផ្គត់ផ្គង់ប្រេងឥន្ធនៈដល់ដៃគូប៊ុលហ្គារីរបស់ខ្លួនគឺ Bulgargaz៕

ប្រែសម្រួល៖ Vann Vann

ប្រភព៖ RT

ចុចអាន៖ រុស្ស៊ី មិនបញ្ឈប់សង្គ្រាមឡើយ ទោះ អ៊ុយក្រែន បោះបង់គំនិតចូល ណាតូ ក៏ដោយ