ប៉ាគីស្ថាន ​​ស្រែកសុំជំនួយពិភពលោក ក្រោយអ្នកស្លាប់កើនលើស ១ពាន់នាក់ ដោយសារទឹកជំនន់

ប្រទេសប៉ាគីស្ថានកំពុងអំពាវនាវសុំជំនួយអន្តរជាតិបន្ថែមទៀត បន្ទាប់ពីទឹកជំនន់បានបំផ្លិចបំផ្លាញនៅទូទាំងប្រទេស ដែលបណ្ដាលឱ្យប្រជាជនជាង ១,០០០នាក់បានស្លាប់ និងជាង ៣០លាននាក់ទទួលរងផលប៉ះពាល់។

កាលពីម្សិលមិញនេះ លោក Salman Sufi រដ្ឋ​មន្ត្រី​ក្រសួងមហាផ្ទៃ បានឱ្យដឹងថា សហរដ្ឋអាមេរិក ចក្រភព​អង់គ្លេស អា​រ៉ាប់​រួម និង​បណ្តា​ប្រទេស​មួយ​ចំនួន​ទៀត បាន​​ចូលរួមបរិច្ចាគថវិកាទៅនឹងការ​អំពាវនាវ​របស់​ប៉ា​គី​ស្ថានរួចមកហើយ​។ ប៉ុន្តែការបរិច្ចាគរទាំងនោះនៅមិនទាន់គ្រប់គ្រាន់នៅឡើយ ដោយសារ​ការ​ជួយ​សង្គ្រោះ​ត្រូវការ​ថវិកា​ជា​ច្រើន​។​ ដូច្នេះប៉ាគីស្ថានមានតែអំពាវនាវសុំជំនួយពីពិភពលោកបន្ថែមប៉ុណ្ណោះ ទើបអាចជួយដោះស្រាយវិបត្តិលើកនេះបាន។

គួររំលឹកថា ប្រទេសប៉ាគីស្ថានបានជួបគ្រោះទឹកជំនន់ តាំងពីខែមិថុនាមកម្ល៉េះ ហើយគ្រោះធម្មជាតិមួយនេះ បានធ្វើឱ្យប្រទេសរងផលប៉ះពាល់យ៉ាងធ្ងន់ធ្ងរ ដោយមានមនុស្សរាប់ពាន់នាក់ត្រូវជម្លៀសចេញពីផ្ទះសម្បែងរបស់ពួកគេ។ ក្នុងនោះមនុស្សជាង ១ពាន់នាក់ឯណោះ បានស្លាប់តាំងពីទឹកជំនន់ចាប់ផ្ដើមលិចលង់។

ថ្លែងទៅកាន់ អ្នកសារព័ត៌មានកាលពីថ្ងៃទី២៧ ខែសីហា ឆ្នាំ២០២២ លោក Sufi និយាយថា ប្រទេសប៉ាគីស្ថានកំពុងត្រូវការការគាំទ្រពីអន្តរជាតិបន្ថែមទៀត៕

ប្រែសម្រួល៖ សន្យា

ប្រភព៖ BBC