ជប៉ុន និងអាមេរិក ធ្វើសមយុទ្ធបាញ់មីស៊ីលប្រឆាំងរថក្រោះ Javelin ដែល អ៊ុយក្រែន ប្រើទប់ រុស្ស៊ី

ជប៉ុន ​និង​អាមេរិក​បាន​ធ្វើ​សមយុទ្ធ​​រួមគ្នាមានទាំងការបាញ់​គ្រាប់ពិតនៃ​មីស៊ីល​ប្រឆាំង​រថក្រោះ Javelin ជាប្រព័ន្ធអាវុធចល័តដែលអាមេរិកផ្គត់ផ្គង់ឲ្យអ៊ុយក្រែនប្រើ​ដើម្បី​ការពារ​រដ្ឋធានីកៀវ ក្រោយសង្គ្រាមលុកលុយ​របស់​រុស្ស៊ី ។

បុគ្គលិកប្រហែល ១,៤០០ នាក់មកពីកងកម្លាំងស្វ័យការពារជើងគោករបស់ប្រទេសជប៉ុន និងប្រហែល ៧០០ នាក់មកពីកងទ័ពសហរដ្ឋអាមេរិកបានចូលរួមក្នុងសមយុទ្ធដែលបានចាប់ផ្តើមកាលពីថ្ងៃអាទិត្យនៅឯទីតាំងហ្វឹកហ្វឺន GSDF នៅទូទាំងតំបន់ Kyushu ។

ទន្ទឹមនោះ សមយុទ្ធរួមគ្នាដែលលនឹង​បន្ត​រហូត​ដល់​ថ្ងៃ​ទី​៣ ខែ​កញ្ញាក៏មានគោលបំណងធ្វើឲ្យប្រសើរឡើងនូវសមត្ថភាពឆ្លើយតបដើម្បីការពារកោះដាច់ស្រយាលរបស់ប្រទេសជប៉ុនផងដែរ ។

ទាហាន​អាមេរិក​បាន​បាញ់​កាំជ្រួចមីស៊ីល Javelin ចំនួន ២ ​គ្រាប់​ទៅកាន់​គោលដៅ​ចម្ងាយ ២ ​គីឡូម៉ែត្រ ខណៈបុគ្គលិកកងកម្លាំងស្វ័យការពារជប៉ុនក៏បានបាញ់មីស៊ីលប្រឆាំងរថក្រោះផ្សេងទៀតផងដែរ ។

គួរបញ្ជាក់ថា នេះជាសមយុទ្ធបាញ់គ្រាប់ពិតលើកដំបូងជាមួយនឹងការប្រើប្រព័ន្ធមីស៊ីល Javelin ដែលធ្វើឡើងដោយយោធាអាមេរិកនៅក្នុងប្រទេសជប៉ុន ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ រុស្ស៊ី ដាក់ចំៗថា អាមេរិក និងណាតូជាប់ពាក់ព័ន្ធក្នុងជម្លោះ អ៊ុយក្រែន