មិនខុសពី អង់គ្លេស ប្រទេសអឺរ៉ុបមួយទៀតប្រកាសអស់អាវុធឲ្យ អ៊ុយក្រែន

រដ្ឋមន្ត្រីការបរទេសអាល្លឺម៉ង់លោកស្រី Annalena Baerbock បានទទួលស្គាល់ថា ទីក្រុងប៊ែរឡាំងកំពុងអស់អាវុធ ហើយមិនអាចបញ្ជូនសព្វាវុធបន្ថែមទៀតទៅអ៊ុយក្រែន ដូចដែលបានសន្យានោះទេ ។

ការប្រកាសនេះកើតឡើងត្រឹមប៉ុន្មានម៉ោងប៉ុណ្ណោះ បន្ទាប់ពីកាសែត The Times បានរាយការណ៍ថា ចក្រភពអង់គ្លេសក៏នឹងអស់សព្វាវុធដើម្បីបញ្ជូនទៅឲ្យប្រទេសអ៊ុយក្រែនផងដែរ ហើយនឹងមិនអាចផ្តល់ជំនួយហិរញ្ញវត្ថុសម្រាប់តម្រូវការយោធារបស់ទីក្រុងកៀវបានទៀតទេនៅត្រឹមចុងឆ្នាំ ២០២២ នេះ ។

នៅក្នុងបទសម្ភាសន៍ជាមួយកាសែត Bild am Sonntag លោកស្រី Baerbock បានទទូចថា អាល្លឺម៉ង់បានត្រៀមខ្លួនរួចជាស្រេចដើម្បីគាំទ្រដល់ទីក្រុងកៀវទាំងផ្នែកយោធា និងហិរញ្ញវត្ថុ ប៉ុន្តែគ្រាន់តែមិនអាចបញ្ជូនអាវុធបន្ថែមទៀតបានទេនៅពេលនេះ ។

លោកស្រីបាននិយាយថា “ពិតណាស់ ប្រជាជនអ៊ុយក្រែនចង់បានការដឹកជញ្ជូនអាវុធឲ្យបានលឿន និងច្រើនជាងមុនដើម្បីបញ្ចប់សង្គ្រាម ។ ប៉ុន្តែយើងមិនមានប្រព័ន្ធអាវុធទំនើបៗនៅក្នុងបរិមាណដែលរដ្ឋាភិបាលទីក្រុងកៀវត្រូវការនៅពេលនេះនោះទេ” ។

គួរបញ្ជាក់ថា ប្រទេសអាល្លឺម៉ង់នៅតែជាអ្នកផ្តល់ជំនួយផ្នែកយោធាកំពូលមួយរបស់អ៊ុយក្រែន ជាមួយនឹងកិច្ចសន្យាក្នុងទំហំទឹកប្រាក់ចំនួន ១.៧ ពាន់លានដុល្លារ ខណៈកញ្ចប់ជំនួយទាំងនោះរួមមានអាវុធប្រឆាំងយន្តហោះ Gepard និង IRIS-T, ជើងទម្របាញ់រ៉ុក្កែត Mars, ប្រព័ន្ធកាំភ្លើងធំ Panzerhaubitze 2000, កាំជ្រួចមីស៊ីល ៧០ មីល្លីម៉ែត្រ ក៏ដូចជាគ្រាប់រំសេវ និងគ្រាប់ផ្លោងគ្រប់ប្រភេទទាំងអស់ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ អង់គ្លេស អាចអស់សព្វាអាវុធ និងមូលនិធិជួយ អ៊ុយក្រែន ត្រឹមចុងឆ្នាំនេះ