រូបភាពពីផ្កាយរណប ៖ ទឹកជំនន់លិចទីតាំងសាកល្បងអាវុធនុយក្លេអ៊ែររបស់ កូរ៉េខាងជើង

រូបភាពពីផ្កាយរណបនាពេលថ្មីៗនេះបង្ហាញថា ការងារជួសជុលទីតាំងសាកល្បងនុយក្លេអ៊ែរ Punggye-ri របស់កូរ៉េខាងជើង អាចត្រូវបានផ្អាក ដោយសារតែការខូចខាតបណ្ដាលមកពីទឹកជំនន់ក្នុងប្រទេស ។

បើយោងតាមមជ្ឈមណ្ឌលយុទ្ធសាស្ត្រអន្តរជាតិ Beyond Parallel ដែលមានមូលដ្ឋាននៅទីក្រុងវ៉ាស៊ីនតោនបានឲ្យដឹងថា រូបភាពពីផ្កាយរណបដែលថតបានកាលពីថ្ងៃពុធសប្ដាហ៍មុន មិនបានបង្ហាញពីសកម្មភាពសំខាន់ៗណាមួយនៅឯទីតាំងសាកល្បងនុយក្លេអ៊ែរ Punggye-ri នោះទេ ជាពិសេសនៅផ្លូវរូងក្រោមដីលេខ ៣ ។

Beyond Parallel បាននិយាយនៅលើគេហទំព័ររបស់ខ្លួនថា “រូបភាពពីផ្កាយរណបដែលថតបានចាប់ពីថ្ងៃទី ២៤ ខែសីហា ឆ្នាំ ២០២២ បង្ហាញថា មិនមានការវិវឌ្ឍ ឬការផ្លាស់ប្តូរគួរឲ្យកត់សម្គាល់ចំពោះតំបន់ខាងក្រៅច្រកសម្រាប់ផ្លូវរូងក្រោមដីលេខ ៣ ដែលសហរដ្ឋអាមេរិក និងកូរ៉េខាងត្បូងបានវាយតម្លៃថា កូរ៉េខាងជើងបានបញ្ចប់ការរៀបចំទាំងអស់សម្រាប់ការសាកល្បងនុយក្លេអ៊ែរនោះទេ” ។

មជ្ឈមណ្ឌលបានបន្ថែមថា “ការសាងសង់ផ្លូវទៅកាន់ផ្លូវរូងក្រោមដីលេខ ៤ ក៏ត្រូវបានផ្អាកផងដែរ ដោយសារតែភ្លៀងធ្លាក់ខ្លាំងបណ្ដាលឲ្យមានទឹកជំនន់លិចផ្លូវចូលតែមួយគត់របស់ទីតាំងសាកល្បងនុយក្លេអ៊ែរ ក្នុងអំឡុងពេល ២ ខែកន្លងមកនេះ” ។

កន្លងមកកូរ៉េខាងជើង​បាន​ស្ម័គ្រ​ចិត្ត​រុះរើ​ទីតាំង Punggye-ri ក្នុង​ឆ្នាំ ២០១៨ ដើម្បី​បង្ហាញ​ឆន្ទៈ​របស់ខ្លួន​ក្នុងការ​រំសាយ​នុយក្លេអ៊ែរ​ដល់​សហគមន៍​អន្តរជាតិ ។ ប៉ុន្តែទោះជាយ៉ាងណាក៏ដោយ នៅដើមឆ្នាំនេះកូរ៉េខាងជើងត្រូវបានគេជឿងថា ចាប់ផ្ដើមជួសជុលទីតាំង Punggye-ri ដែលជាកន្លែងនៃការសាកល្បងនុយក្លេអ៊ែរទាំង ៦ របស់ខ្លួន ៕

ប្រែសម្រួលដោយ ៖ ជីវ័ន្ត

ប្រភព ៖ Yonhap

ចុចអាន ៖ សារព័ត៌មាន រុស្ស៊ី ថា ក្រុមភេរវករ អ៊ុយក្រែន គំរាមសម្លាប់និពន្ធនាយក RT និង Sputnik