ព័ត៌មានអន្ដរជាតិ

ថ្ងៃនេះ EU ចាប់ផ្ដើមចាក់វ៉ាក់សាំងកូវីដ

បានផុស

៤ years មុន

នៅ

ថ្ងៃអាទិត្យ ២៧ ធ្នូ ២០២០

ដោយ

ប្រធានគណៈកម្មាធិការសហភាពអឺរ៉ុបបានប្រកាសថា វ៉ាក់សាំងកូវីដ ១៩ ដែលបង្កើតដោយក្រុមហ៊ុនឱសថអាល្លឺម៉ង់ BioNTech និងដៃគូសហការ Pfizer របស់អាមេរិកត្រូវបានបញ្ជូនទៅគ្រប់ប្រទេសនៅអឺរ៉ុបហើយចាប់ផ្តើមចាក់វ៉ាក់សាំងនៅថ្ងៃអាទិត្យនេះ ។

ការប្រកាសអំពីការផ្តល់វ៉ាក់សាំងក្នុងសារជាវីដេអូ ប្រធានគណៈកម្មាធិការសហគមន៍អ៊ឺរ៉ុបលោកស្រី Ursula von der Leyen បានមានប្រសាសន៍ថា “យើងកំពុងចាប់ផ្តើមទំព័រថ្មីក្នុងឆ្នាំដ៏លំបាកមួយ ។ ប្រទេសសហភាពអឺរ៉ុបទាំងអស់ទទួលបានវ៉ាក់សាំងក្នុងពេលតែមួយ ហើយវ៉ាក់សាំងជាច្រើនទៀតនឹងមកដល់ក្នុងពេលឆាប់ៗនេះដែលមនុស្សអាចវិលត្រឡប់ទៅរកជីវិតធម្មតាវិញ” ។

វ៉ាក់សាំង BioNTech/Pfizer គឺជាវ៉ាក់សាំងដំបូងគេដែលទទួលបានការយល់ព្រមពីទីភ្នាក់ងារថ្នាំអឺរ៉ុប (EMA) ដែលជានិយតករថ្នាំរបស់សហភាពអឺរ៉ុប ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បច្ចុប្បន្ន EMA ក៏កំពុងវាយតម្លៃវ៉ាក់សាំងពីក្រុមហ៊ុនផលិតថ្នាំអាមេរិក Moderna ផងដែរ ហើយត្រូវបានគេរំពឹងថានឹងធ្វើការសម្រេចចិត្តលើវ៉ាក់សាំងនេះនៅសប្តាហ៍ដំបូងនៃខែមករា ។

គណៈកម្មការសហគមន៍អ៊ឺរ៉ុបមិនបានបង្ហាញពីចំនួនវ៉ាក់សាំងប៉ុន្មានដែលត្រូវបានចែកចាយទៅរដ្ឋជាសមាជិកនោះទេ ហើយក៏មិនបានបញ្ជាក់ថាតើមានវ៉ាក់សាំងប៉ុន្មានត្រូវបានបញ្ជូនទៅប្រទេសណាដែរ ។ ប៉ុន្តែសម្រាប់ពេលនេះចំនួនដូសគឺមានតិចតួចណាស់ដោយសារតែការផលិតមានកំណត់ ។

គណៈកម្មការសហភាពអឺរ៉ុបក្នុងនាមរដ្ឋជាសមាជិកទាំងអស់បានចុះហត្ថលេខាលើកិច្ចសន្យាជាមួយក្រុមហ៊ុនចំនួន ៦ ដើម្បីទិញវ៉ាក់សាំងសរុបចំនួន ២ ពាន់លានដូស ។ សហភាពអឺរ៉ុបនឹងទទួលបានវ៉ាក់សាំង ៤០០ លានដូសពីក្រុមហ៊ុន AstraZeneca, ៣០០ លានដូសពីក្រុមហ៊ុន Sanofi-GSK, ៤០០ លានដូសពីក្រុមហ៊ុន Johnson & Johnson, ៣០០ លានដូសពីក្រុមហ៊ុន Pfizer-BioNTech, ៤០៥ លានដូសពីក្រុមហ៊ុន CureVac និង ១៦០ លានដូសពីក្រុមហ៊ុន Moderna ។

ចំណែកវ៉ាក់សាំងរបស់ក្រុមហ៊ុន Novavax ក៏បានឈានដល់ដំណាក់កាលនៃកិច្ចសន្យាចំនួន ២០០ លានដូស ។ ជាមួយនឹងការចុះហត្ថលេខាលើកិច្ចព្រមព្រៀងនេះចំនួនដូសដែល EU អាចប្រើបាននឹងឈានដល់ចំនួន ២.២ ពាន់លានដូស ។

ប្រទេសនៅសហភាពអ៊ឺរ៉ុបនីមួយៗនឹងកំណត់ថាតើអ្នកណានឹងត្រូវផ្តល់អាទិភាព ហើយមិនមានសេចក្តីសម្រេចចិត្ត ឬអនុសាសន៍រួមរបស់សហភាពអឺរ៉ុបលើបញ្ហានេះនោះទេ ។

គួរបញ្ជាក់ថា គិតត្រឹមពេលនេះករណីឆ្លងជំងឺកូវីដ ១៩ ទូទាំងពិភពលោកមានចំនួន ៨០,៧១៥,៨៨០ ករណី និងមានអ្នកស្លាប់ចំនួន ១,៧៦៤,៥៦៣ នាក់ ៕